एजेन्सी – अष्ट्रेलियाले वेस्ट इन्डिजलाई तेस्रो ओडिआईमा मंगलबार ८ विकेटले हराउँदै ३ खेलको ओडिआई सिरिजमा क्लिन स्विप गरेको छ ।

तेस्रो तथा अन्तिम खेलमा जितको लागि पाएको ८७ रनको लक्ष्य अष्ट्रेलियाले ६.५ ओभरमा २ विकेट गुमाउँदै पूरा गरेको थियो। ओपनर ज्याक फ्रेजर म्याकगुर्कले १८ बलमा ५ चौका र ३ छक्कासहित ४१ रनको आक्रामक इनिङ खेले ।

जोश इंग्लिस १६ बलमा ३५ रनमा नट आउट रहे । स्टिभ स्मिथ ६ रनमा‌ नटआउट रहे । वेस्ट इन्डिजका अल्नारी जोसेफ र ओसान थोमसले समान १ विकेट लिए ।

त्यसअघि भ्रमणकारी टोली वेस्ट इन्डिजले टस हारेर पहिला ब्याटिङको निम्तो पाएको थियो । वेस्टइन्डिज २४.१ ओभरमा ८६ रनमा अल आउट भएको थियो ।
ओपनर एलिक एथानाजेले सर्वाधिक ३२ रन बनाए । रोस्टन चेस १२ र केसी कार्टी १० रन बनाए थिए ।

अन्य कुनै पनि ब्याटरले दोहोरो अंकमा रन बनाउन सकेनन् । अष्ट्रेलियाका जेभियर ब्रार्टलेटले ४ विकेट लिए । लान्सी मोरिस र एडम जाम्पाले समान २ विकेट लिएका थिए । अष्ट्रेलियाका जेभियर ब्रार्टलेट अन्तिम खेलको प्लेयर अफ दि म्याच र प्लेयर अफ दि सिरिज चुनिए थिए।

अष्ट्रेलिया पहिलो खेलमा ८ विकेट र दोस्रो खेलमा ८३ रनले विजयी भएको थियो ।