काठमाडौँ (हाम्रो खेलकुद) – दीपेन्द्र सिंह ऐरीले एक्लै सात विकेट लिएपछि नेपाल पुलिस क्लब प्रधानमन्त्री कप पुरुष क्रिकेट प्रतियोगिताको शतप्रतिशत जित हात पार्दै फाइनलमा प्रवेश गरेको छ । मुलपानीमा आज भएको खेलमा पुलिसले सुदूरपश्चिम प्रदेशलाई ७८ रनले पराजित गर्दै लिग चरणमा ९ मध्य ९ जित हात पारेको हो ।

पुलिसले दिएको १९९ रनको लक्ष्य पछ्याएको सुदूरपश्चिम ढिलो शुरुवातका कारण ४९ ओभरमा सिमित भएको खेलमा ३७.१ ओभरमा १२० रनमा आउट भएको थियो ।

सुदूरलाई हराउन दीपेन्द्र सिंह ऐरी एक्लैले सात विकेट लिए । उनले १० ओभर बलिङ गरेर चार मेडन सहित २० रन मात्र दिए । ललित भण्डारी, सागर ढकाल र ललित राजवंशीले एक-एक विकेट लिए ।

सुदूरपश्चिमका लागि गजेन्द्र बोहराले ४१ बलमा ४ चौका र १ छक्का प्रहार गर्दै सर्वाधिक ३० रन बनाए । किरण ठगुन्नाले १८ बलमा तीन चौका र एक छक्का प्रहार गर्दै २४ रन बनाए । नरेन साउद ३८ बलमा २४ रनमा नटआउट रहे । 

त्यसअघि टस जितेर पहिले ब्याटिङ रोजेको पुलिस ४७.५ ओभरमा १९८ रनमा अलआउट भयो । पुलिसका लागि शंकर रानाले ५२ बलमा सर्वाधिक ४६ रन बनाए । दीपेन्द्र सिंह ऐरीले ३८ बलमा ४४ रन बनाए । अर्जुन साउदले ३२ रन बनाए भने आरिफ शेखले २६ रनको योगदान गरे ।

सुदूरका लागि शेर मल्लले ३ विकेट लिए भने नारायण जोशी, विकास आगरी र मिलन बोहराले २/२ विकेट लिए । दिपक चन्दले एक विकेट लिए ।

पुलिसले नौ खेलबाट नौ जितसहित १८ अंकमा लिग चरण समाप्त गरेको छ । पुलिसले शनिबार फाइनलमा आर्मीसँग भिड्नेछ ।

उता सुदूर नौ खेलमा चार जितसहित छैटौं स्थानमा रहन सफल भयो ।