कानपुर (एजेन्सी)– इङ्ल्यान्डले पहिलो टि ट्वान्टी क्रिकेटमा भारतलाई ७ विकेटले हराएको छ । तीनवटा टि ट्वान्टीको श्रृंखलामा इङ्ल्यान्डले १–० को अग्रता लिएको छ । १ सय ४८ रनको लक्ष्य पछ्याएको इङ्ल्यान्डले ३ विकेटको नोक्सानीमा ११ बलअघि नै आवश्यक रन जोडेको थियो ।

जोय रुट र कप्तान इयान मोर्गानले तेस्रो विकेटका लागि ८३ रनको साझेदारी गरेपछि एक दिवसिय श्रृखंला गुमाएको इङ्ल्यान्डले पहिलो टि ट्वान्टी क्रिकेट जितेको थियो । रुटले ४६ बलमा ४ चौका साथ अविजित ४६ रन जोडे ।

अर्धशतक पुरा गरेका मोर्गानले ३८ बलमा ४ छक्का र १ चौका प्रहार गरे । मोर्गानले ५१ रन बनाएका थिए । बेन स्टोक्सले अविजित २ रन जोडे । त्यसअघि ओपनर जासन रोय १९ र साम बिलिङ्सले २२ रन बनाएका थिए ।

घरेलु टोली भारतका लागि युजभेन्दर चाहलाले २ तथा परवेज रसुलले १ विकेट लिएका थिए । त्यसअघि टस हारेर भारतले पहिले ब्याटिङको निम्ता पाएको थियो । भारतले ७ विकेटको क्षेतिमा १ सय ४७ रन बनाएको थियो ।

कप्तान विराट कोहलीले ओपरको भूमिका निर्वाह गरेको खेलमा पूर्व कप्तान महेन्द्र सिंह धोनीले टोलीका लागि सर्वाधिक अविजित ३६ रन बनाएका थिए । २७ बल खेलेका धोनीले ३ चौका साथ ३६ रन जोडे । सुरेश रैनाले २३ बलमा ४ चौका र १ छक्का साथ ३४ रन बनाएका थिए ।

त्यस्तै कोहलीले २६ बलमा ४ चौकासहित २९ रन जोडे । युवराज सिंहले १२ रन बटुले भने बाँकी कुनै पनि ब्याट्सम्यानले दोहोरो आँकडामा रन बनाउन सकेनन् । इङ्ल्यान्डका मोइन अलीले २ तथा टाइमल मिल्स, क्रिस जोर्डन, लिअम प्लन्केट र स्टोक्सले समान १ विकेट लिए ।

४ ओभरमा २१ रन दिएका इङ्ल्यान्डका अली म्यान अफ दी म्याच घोषित भए । यी दुई टोलीबीचको दोस्रो टि ट्वान्टी आइतबार नागपुरमा हुनेछ ।