काठमाडौं (हाम्रो खेलकुद) – अल्टिमेट इन्डोर्स प्रा.लि. र पाण्डा इभेन्ट्सको आयोजनामा अर्को महिना अन्तर कलेज सुपर क्रिकेट प्रतियोगिता हुने भएको छ । फागुन १ गते देखि लिग कम नकआउटका आधारमा कोटेश्वरस्थित अल्टिमेट इन्डोर्स क्रिकेटमा हुने प्रतियोगितामा २४ क्लबको सहभागिता रहने बिहीबार राजधानीमा आयोजित पत्रकार सम्मेलनमा अल्टिमेटका निर्देशक उत्तम खडायतले जानकारी दिए ।

सहभागी २४ टोलीलाई ८ समूहमा विभाजन प्रतिस्पर्धा गराएपछि समूहका शीर्ष दुई टोली अन्तिम १६ मा पुग्नेछन् । लिग कम नकआउट १२ ओभर र नकआउट १८ ओभरमा खेलाइने अल्टिमेटका अर्का निर्देशन अर्जुन पाण्डेले बताए । युवा बिद्यार्थीलाई क्रिकेटमा आकर्षित गर्ने उद्देश्यले आयोजना गर्न लागिएको प्रतियोगितामा कलेज टोलीबाट राष्ट्रिय क्रिकेट टोलीका खेलाडीले पनि खेल्न सक्छन् ।

झन्डै ८ लाख रुपैयाँ खर्च हुने अनुमान गरिएको प्रतियोगितामा सहभागि टोलीले दर्ता शुल्क ३० हजार रुपैयाँ तिर्नुपर्नेछ । प्रतियोगिता भर सहभागी टोलीका लागि जर्सी, ब्याट,बल र खानाको व्यवस्था आयोजना गर्ने बताइएको छ । झन्डै दुई साता चल्ने प्रतियोगिताको विजेता टोलीले १ लाख रुपैयाँ पाउँनेछ । प्रतियोगिताको प्लेयर अफ दी सिरिजले १० तथा उत्कृष्ट बलर र ब्याट्सम्यानले समान ५ हजार रुपैयाँ पाउनेछन् ।

प्रतियोगिताका ब्रान्ड एम्बेसडर रहेको राष्ट्रिय क्रिकेट टोलीका सदस्य प्रदीप ऐरीले क्रिकेटको क्रेज बढी रहेकोले यस्ता प्रतियोगिताले नयाँ खेलाडीलाई प्रोत्साहन मिल्ने बताए । अल्टिमेट र पाण्डाले हरेक बर्ष प्रतियोगितालाई आयोजना गर्ने लक्ष्य राखेको बताइएको छ ।