काठमाडौँ (हाम्रो खेलकुद) – नेपाल एपिएफ क्लबले प्रधानमन्त्री कप पुरुष क्रिकेट प्रतियोगितामा लगातार दोस्रो जित दर्ता गरेको छ । एपिएफले मुलपानीमा गण्डकी प्रदेश माथि ८८ रनको जित दर्ता गर्दै लगातार दोस्रो जित दर्ता गरेको हो ।

२०८ रनको मध्यम लक्ष्य पछ्याइरहेको गण्डकी ३३.४ ओभरमा ११९ रनमा समेटियो।  गण्डकीका लागि ओपनर समिर कंडेलले सर्वाधिक ३३ रनको इनिंङ खेले । यस्तै अर्का ओपनर इश्वोर छेत्रीले २८ रन बनाए । कप्तान बिपिन खत्री १८ रनमा अविजित रहे ।    

एपिएफका लागि अमर राउटेलाले सर्वाधिक ४ विकेट लिए । यस्तै मौसम ढकालले ३ तथा भुवन कार्कीले २ विकेट लिए । अर्को एक विकेट रमेश कुर्मीले लिए ।      

त्यसअघि टस हारेर ब्याटिङको निम्तो पाएको एपिएफ ४७.२ ओभरमा २०७ रनमा समेटियो ।  एपिएफका लागि ओपनर लोकेश बमले ६७ बलमा ५ चौका र २ छक्का सहित सर्वाधिक ५० रन बनाए । यस्तै भुवन कार्कीले ५२ बलमा ४५ रनको इनिंङ खेले । 

प्रदिप ऐरिले ४५ बलमा ३९ रन बनाए भने पुरन विकले ४६ बलमा ३० रन बनाए । अन्य ब्याटरले दोहोरो अंक छुन सकेनन् । 

गण्डकीका लागि कमल परियारले सर्वाधिक ३ विकेट लिए । यस्तै बिपिन खत्री, अमृत गुरुङ र सन्दिप पराजुलीले समान २-२ विकेट लिए ।

एपिएफ ७ खेलमा ४ जित र ३ हार सहित छैठौ स्थानमा छ । गण्डकी भने ८ खेलमा २ जित सहित आठौ स्थानमा छ ।