काठमाडौं (हाम्रो खेलकुद) – बागमती प्रदेशले प्रधानमन्त्री कप २०२४ मा सुदूरपश्चिम प्रदेशमाथि जित दर्ता गरेको छ ।

मुलपानी क्रिकेट मैदानमा बागमतीले सुदूरपश्चिमलाई ९७ रनले पराजित गरेको हो । जितका लागि २ सय ४८ रन पछ्याउने क्रममा सुदूरपश्चिम ३१ औं ओभरमा १ सय ५० रनमा अलआउट भयो । बागमती ८ खेलमा १० अंकका साथ दोस्रो स्थानमा उक्लेको छ । पाँचौ स्थानमा रहेको सुदूरपश्चिमको ६ खेलमा ८ अंक छ ।

राम्रो सुरुवात पाएपनि सुदूरपश्चिमले मध्यक्रममा राम्रो गर्न सकेन । राजु रिजाललाई २ रनमा गुमाएपछि दोस्रो विकेटका लागि खडक बोहोरा र नरेन भट्टले ६४ रनको साझेदारी गरेका थिए । खडक १२ औं ओभरको पहिलो बलमा २१ रन जोड्दै आउट भएपछि नरेन पनि लामो समय टिकेनन् ।

नरेन १५ औं ओभरमा आउट भएपछि लगातार विकेट खसेको थियो । नरेनले ४४ बलमा ६ चौकासहित ४१ रन जोडे । तल्लोक्रममा किरण ठगुन्नाले २७ बलमा ४ चौका र ३ छक्कासहित ४१ रन बनाए । अन्यले भने खासै योगदान दिन सकेनन् ।

सूर्य तामाङ र विपिन आचार्यले ३-३ विकेट लिए । रिजन ढकाल, क्रिजन गुरुङ र सोनु देवकोटाले १-१ विकेट हात पारे ।

त्यसअघि टस हारेर ब्याटिङको निम्तो पाएको बागमतीले निर्धारित ५० ओभरमा ९ विकेट गुमाउँदै २ सय ४७ रन जोडेको थियो । बागमतीका लागि ओपनर आशुतोष घिरैयाले उच्च लय कायम राख्दै अर्धशतक बनाए ।

आशुतोषले ६२ बलमा ६ चौका र ३ छक्कासहित ५४ रन जोडे । उनले कप्तान रित गौतमसँग दोस्रो विकेटका लागि ७६ रनको साझेदारी गरेका थिए । रितले ६१ बलमा ९ चौकासहित ४४ रन जोडे ।

बागमतीका इशान पाण्डे २, रविन जोशी २४, अशोक पौडेल ३१ विपिन आचार्य १२ रनमा आउट भए । सोनु देवकोटाले तल्लोक्रममा २० बलको सामना गर्दै २ चौका र २ छक्कासहित नटआउट २८ रनको योगदान दिए । प्रतिशले १-१ चौका र छक्कासहित १४ बलमा १७ रन जोडे ।

सुदूरपश्चिमका लागि नारायण जोशी र शेर मल्लले ३-३ विकेट लिए । विकास आग्रीले २ र मिलन बोहोराले १ विकेट हात पारे ।