काठमाडौं (हाम्रो खेलकुद) – कप्तान रोहित पौडेलको लगातार अर्धशतक र स्पिनर रमेश कुर्मीको ५ विकेटमा नेपाल एपिएफ क्लबले प्रधानमन्त्री कप २०२४ मा लुम्बिनी प्रदेशमाथि जित दर्ता गरेको छ ।

भैरहवास्थित सिद्धार्थनगर रंगशालामा एपिएफले लुम्बिनी प्रदेशमाथि ७ विकेटको जित दर्ता गरेको हो । जितका लागि १ सय ३३ रनको लक्ष्य पछ्याएको एपिएफले २२.३ ओभरमा ३ विकेटको क्षतिमा जित दर्ता गर्यो । यससँगै एपिएफ ६ खेलमा ६ अंक जोड्दै छैटौं स्थानमा उक्लेको छ ।

कप्तान रोहित पौडेलले ४८ बलमा ५२ रन जोड्दै जितभन्दा २ बलअघि आउट भए । उनले ४ चौका र १ छक्का प्रहार गरे । रोहितले यसअघि आर्मीविरुद्ध पनि अर्धशतक बनाएका थिए । पछिल्लो ५ मध्य ४ इनिङमा उनले अर्धशतक बनाएका छन् ।

पुरण विक ५७ बलमा २ चौका र १ छक्कासहित ३३ रनमा नटआउट रहे । अमरसिंह राउटेलाले २ बलमा विजयी छक्कासहित ८ रन जोडे ।

एपिएफले ओपनर लोकेश बमलाई पाँचौ ओभरको पहिलो बलमा गुमाएको थियो । १४ बलमा २ चौका र १ छक्कासहित उनले १६ रन जोडे । अर्का ओपनर प्रज्वल शाही १५ बलमा १ चौकासहित ५ रनमा आउट भए । लुम्बिनीका मोहमद हुसेन, कृष्ण कार्की र इक्लाख अहमदले १-१ विकेट लिए ।

त्यसअघि बायाँ हाते स्पिनर रमेश कुर्मीले ५ विकेट लिएपछि एपिएफले लुम्बिनी प्रदेशलाई १ सय ३३ रनको सामान्य योगफलमा अलआउट गरेको थियो ।

टस जितेर पहिलो ब्याटिङ रोजेको लुम्बिनी ४१ ओभरमा अलआउट भयो । राम्रो सुरुवात पाएको लुम्बिनीको इनिङलाई एपिएफका रमेशले धराशायी पारेका थिए । उनले लगातार मध्यक्रमको विकेट लिँदै ठूलो स्कोर निर्माण हुन दिएनन् ।

लुम्बिनीका लागि दिलसाद अलीले सर्वाधिक ३९ रनको योगदान दिए । टोली अलआउट भएपनि नटआउट रहेका उनले ४२ बलमा ५ चौका प्रहार गरेका थिए ।

ओपनर मृनाल गुरुङले लुम्बिनीका लागि ३४ रनको योगदान दिए । उनले ८८ बलमा ३ चौका प्रहार गरेका थिए ।अर्का ओपनर विराट भण्डारी ५१ बलमा ४ चौकासहित २३ रन जोड्दै आउट भए । १४ औं ओभरमा विराट आउट हुनुअघि यी दुईले ३९ रनको साझेदारी गरेका थिए । त्यो नै इनिङको सर्वाधिक साझेदारी बन्यो ।

त्यसपछि प्रज्वल थापा ११, मोहमद हुसेन ३, कृष्ण कार्की १, सुशान्त थापा २ र इक्लाख अहमद ९ लगातार स्पिनको शिकार बने । तल्लोक्रमा दिल्शादले आक्रामक रन जोड्दै लुम्बिनीलाई सम्मानजनक योगफलसम्म पुर्याए । पुछारका तीन ब्याटर नर सार्की, अभिषेक गौतम र अजय चौहानले खाता खोल्न सकेनन् ।

एपिएफका लागि रमेशले १० ओभरमा २ मेडनसहित २९ रन खर्चेर ५ विकेट लिए । भुवन कार्कीले ३ तथा रोहित पौडेल र मौसम ढकालले १-१ विकेट हात पारे ।