एजेन्सी – श्रीलंकाले आइसिसी यू १९ विश्व कप क्रिकेटमा एक सय ३३ रनको योगफललाई पनि जोगाएको छ । दक्षिण अफ्रिकामा जारी विश्व कपमा लगातार दोस्रो खेल जित्ने क्रममा बुधबार नामिबियालाई ७७ रनले पराजित गरेको छ ।

एक सय ३४ रनको लक्ष्य पछ्याएको नामिबिया २७ ओभरमा ५६ रनमा अलआउट भएको थियो । टोलीका लागि पिटर डानियल ब्लिग्नाउटले नकआउट १८ र हान्रो बाडेनहोर्टसले ११ रन बनाउनुबाहेक कुनै पनि ब्याटरले दोहोरो अंकमा रन बनाउन सकेनन् ।

नामिबियालाई लक्ष्यमा पुग्न नदिन रौभिसन पेरेराले ५ ओभरमा ३ मेडनमा ३ रन खर्चेर ३ विकेट, विश्वा लाहिरुले ७ ओभरमा १ मेडनसहित १९ रन खर्चेर ३ विकेट लिएका थिए । त्यस्तै दिनुरा कलुपाहानाले ८ ओभरमा ४ मेडन राख्दै ८ रन खर्चेर २ तथा गरुका शन्केटले ६ ओभरमा २ मेडन राखेर १३ रन दिदै १ विकेट लिएका थिए ।

त्यसअघि नामिबियाले टस जितेर श्रीलंकालाई ब्याटिङमा बोलाएको थियो । श्रीलंका सुपुन वाडुगेको अर्धशतकसँगै ३५.५ ओभरमा १ सय ३३ रनमा अलआउट भएको थियो ।

सुपुनले धर्यतापूर्वक ब्याटिङ गर्ने क्रममा ७९ बलमा ६ चौका साथ नटआउट ५६ रन बनाएका थिए । रुसान्दा गामागेले १७, सारुजान सानमुगानन्थानले १३ र सिनेथ जयावद्र्धनले १० रन बनाएका थिए । अन्य कुनै पनि ब्याटर चलेनन् ।

नामिबियाका जाचेओ भान भुरेनले ८ ओभरमा २३ रन खर्चेर ४ विकेट, जोहानेस डि भिलियर्सले ३ तथा ज्याक ब्रासेल र पिटर डानियलले स मान १ विकेट लिएका थिए । समूहमा दुई जितपछि श्रीलंका ४ अंकसहित शीर्षस्थानमा छ ।

अस्ट्रेलिया २ अंकसहित दोस्रो स्थानमा छ । जिम्बावे र दुबै खेल गुमाएको नामिबिया अंक विहिन छ । लिग कम नकआउटपछि समूहका शीर्ष ३ टोली सुपर सिक्समा पुग्नेछन् ।