काठमाडौं (हाम्रो खेलकुद) – नेपाल राष्ट्रिय यू-१९ टोलीका कप्तान देव खनालले आइसीसी यू-१९ विश्वकपको पहिलो खेलमा न्युजिल्यान्डसँग हार बेहोरेपछि टोलीको प्रदर्शन अझ राम्रो हुन सक्ने बताएका छन् ।

जितका लागि ३ सय ३ रनको लक्ष्य पछ्याएको नेपालले पूरा ५० ओभर ब्याटिङ गर्दै २ सय ३८ रन जोड्यो । नेपालका लागि अर्जुन कुमालले ९० रनको योगदान दिएका थिए । कप्तान देवले खेलपछि बोल्दै टोलीको प्रदर्शनबारे यसो भने ।

‘खेलाडीले देखाएको प्रदर्शन र प्रयासबाट खुसी छु । गौरव महसुस भएको छ । यो भन्दा केहि राम्रो हुन सक्थ्यो । हामीले आउने खेलमा त्यसलाई हेर्नेछौं ।’

देवले अर्जुनको प्रदर्शनको पनि खुलेर प्रशंसा गरे । ‘अर्जुन हाम्रो लागि एसिया कपदेखि राम्रो गरिरहेका छन् । उनको ब्याटिङका लागि खुसी छु । तर शतक बनेको भए अझ राम्रो हुन्थ्यो । उनी हाम्रो महत्त्वपूर्ण खेलाडी हुन्,’ देवले थपे ।

कप्तान देवले बलर र फिल्डरबाट राम्रो सुरुवात गर्न नसकेको स्वीकारे । ‘आज फिल्डीङ राम्रो गरेको भए अझ राम्रो हुने थियो । बलरले पनि लाइनमा ध्यान दिनुपर्ने देखिन्छ । यो कमजोरीलाई आउने खेलमा सुधार गर्नेछौं,’ उनले भने ।

ब्याटिङमा भने आफूसहित शीर्षक्रमका अन्य ब्याटरले राम्रो गर्न नसकेको देवले बताए । ‘क्रिजमा सकारात्मक सोचका साथ गएका थियौं । तर सुरुवातमै २ विकेट गएपछि अर्जुन र मैले इनिङ बढायौं । निकै महत्त्वपूर्ण समयमा मेरो विकेट गयो । सायद म बसेको भए सहज हुन्थो । तल्लो क्रममा ब्याटरले राम्रो साथ दिए र स्कोर लगातार बढ्यो ।’

यो पनि : विश्वकपको पहिलो खेलमा न्युजिल्यान्डसँग नेपालको हार

अर्जुन शतकबाट चुके!