काठमाडौं (हाम्रो खेलकुद) – नेपाल यू-१९ राष्ट्रिय क्रिकेट टोलीका ओपनर अर्जुन कुमाल आइसीसी यू-१९ विश्वकप अन्तर्गत न्युजिल्यान्डविरुद्ध जारी खेलमा शतकबाट चुकेका छन् ।

नेपालको इनिङलाई अघि बढाउन एक्लो योद्धाको रुपमा खेलेका अर्जुन नर्भस नाइन्टिजको शिकार भए । उनी ९० रनमा रहँदा टप एज लाग्दै थर्ड म्यानमा क्याच आउट भएका हुन् । अर्जुनले १ सय ४ बलको सामना गर्दै १२ चौका प्रहार गरे ।

इनिङको क्रममा तीन पटक जीवनदान पाएका उनले आफ्नो शैलीअनुसार ब्याटिङ गर्दै इनिङ बढाएका थिए । ७३ बलमा ६ चौकासहित अर्धशतक पूरा गरेका उनले त्यसपछि भने खेलको आवश्यकता अनुसार आफ्नो रन गति बढाएका थिए । तर आक्रामक सट खेल्ने धुनमा उनी आउट भए ।

अर्जुन यू-१९ विश्वकपमा सर्वाधिक स्कोर बनाउने सुचिमा संयुक्त दोस्रो स्थानमा छन् । यसअघि प्रदीप ऐरीले सन् २०१२ मा नामिबियाविरुद्ध ९८ नटआउट बनाएका थिए ।

अर्जुन लगातार दोस्रो अन्तर्राष्ट्रिय प्रतियोगितामा शतक बनाउनबाट चुकेका हुन् । गत डिसेम्बरमा यू-१९ एसिया कपका दौरान अफगानिस्तानविरुद्ध अर्जुनले ९१ रन जोडेका थिए । उनले यू-१६ उमेर समूहदेखि लगातार रन जोड्दै आएका छन् ।

अर्जुनले यसअघि सन् २०२३ को एसीसी यू-१९ प्र्मिमियर कपमा साउदी अरबविरुद्ध १ सय ४३ रनको इनिङ खेलेका थिए । उनी अन्तर्राष्ट्रिय क्रिकेटमा नेपालका लागि एकै इनिङमा सर्वाधिक रन जोड्ने खेलाडी पनि हुन् ।

अर्जुनले ५ वर्षअघि १३ वर्षको उमेरमा यू-१६ प्रतियोगिता खेल्दाको अनुभव यसरी साटेका थिए : राष्ट्रिय टोलीदेखि आईपीएलसम्मको ‘अर्जुन’ दृष्टि