काठमाडौं (हाम्रो खेलकुद) – नेपाल एपीएफ क्लबले प्रधानमन्त्री कप एकदिवसीय राष्ट्रिय प्रतियोगितामा मधेश प्रदेशलाई २ सय ४७ रनको प्रतिस्पर्धात्मक लक्ष्य दिएको छ । टियु क्रिकेट मैदानमा टस हारेर पहिला ब्याटिङको निम्तो पाएको एपीएफले निर्धारित ५० ओभरमा ९ विकेट गुमाउँदै २ सय ४६ रन बनायो ।

एपीएफका ओपनर आसिफ शेखले ६९ बलमा ५ चौका र ३ छक्कासहित सर्वाधिक ५९ बनाए । कप्तान रोहित पौडेल ७४ बलमा ५ चौका र २ छक्कासहित ५८ रन बनाए ।

ओपनर प्रज्वल शाही तेस्रो बलमै रुपेश सिंहको बलमा शून्या क्याच आउट भएका थिए । त्यसपछि दोस्रो विकेटका लागि आसिफ र रोहितले १ सय ३२ रनको शतकीय साझेदारी गर्दै खेलमा फर्काएका थिए ।

रोहित स्पिनर रञ्जित कुमारको २५ औं ओभरको पहिलो बलमा डीप स्क्वायर लेगमा क्याच आउट भए । स्वीप हान्ने धुनमा उनी क्याच आउट भएका थिए ।

अर्को ओभरमा अरनिको यादवलाई चोभार एन्डतर्फ सर्ट खेल्ने धुनमा लङअफमा आसिफ शेख पनि अभिषेक तिवारीबाट क्याच आउट भए । त्यसपछि प्रदीप पासवानले मध्यक्रममा तीन महत्व विकेट लिँदै एपीएफलाई विशाल योगफल बनाउन बाट रोकेका थिए ।

प्रदीप पासवानले सन्दीप जोरालाई ३३ औं ओभरको दोस्रो बलमा २० रनमा क्याच आउट गराए । यसै ओभरको पाँचौं बलमा सुमित महर्जन ९ रनमा कट एण्ड बोल्ड आउट भए । पासवानले लोकेश बमलाई ६ रनमा एलबीडब्लू आउट गरेपछि एपीएफ १६५–३ बाट १७३–६ को कमजोर अवस्थामा पुगेको थियो ।

आठौं विकेटका लागि अभिनाश बोहरा र अमरसिंह राउटेलाले ५२ रनको साझेदारी गरे । अभिनाश ८ रनमा रिटायर्ड हर्ट भए । उनको बायाँ हातमा चोट लागेको थियो ।

तर रमेश कुर्मी र मौसम ढकाल रुपेश सिंहको बलमा आउट भएपछि अभिनाश पुन ब्याटिङमा गएका थिए । अमरसिंह राउटेला ५७ बलमा २ चौका र ३ छक्कासहित ४९ रनमा नट आउट रहे ।

मधेशका स्पिनर प्रदीप पासवानले १० ओभरमा ३५ रन खर्चेर ३ विकेट लिए । रुपेश सिंहले ५ ओभरमा १ मेडनसहित ३१ रन खर्चेर ३ विकेट लिए । रन्जित कुमारले १० ओभरमा १ मेडनसहित ४५ रन खर्चेर २ विकेट लिए ।