एजेन्सी – भारतले निकै रोमान्चक तेस्रो तथा अन्तिम टि२० आई खेलको दोस्रो सुपर ओभरमा अफगानिस्तानलाई पराजित गरेको छ । योसँगै तीन खेलको सिरिजमा क्लिनस्विप पनि गरेको छ ।

खेल जित्न अफगानिस्तानले दोस्रो सुपर ओभरमा मात्रै १२ रन पाएको थियो । स्पिनर रवि विश्रोईको पहिलो बलमा मोहम्मद नाबी लङअफमा रिंकु सिंहबाट क्याच आउट भए । दोस्रो बलमा करिम जन्नतले एक रन जोडे । तेस्रो बलमा गुरबाज रिंकुबाट क्याच आउट भएपछि भारत विजयी भएको थियो ।

दोस्रो सुपर ओभरको पहिलो बलमा फरिद अहमदलाई रोहित शर्माले सुरुवाती दुई बलमा छक्का र चौका हानेका थिए । तेस्रो बलमा एक रन दिए । चौथो बल रिंकु सिंहलाई डट राखे ।

तर गुरबाज एज लागेर भन्दै रिभ्यु लिन भनेका थिए । रिभ्युमा रिंकु आउट भए । पाँचौं बलमा रोहित शर्मा एक रन लिनेक्रममा रन आउट भएपछि अफगानिस्तानले खेल जित्न १२ रन बनाउनु पर्ने थियो ।

भारतले सुपर ओभरमा जितको लागि १७ रन बनाउनु पर्ने थियो । तर १६ रन बनाएपछि पुन अर्को सुपर ओभर भयो । ब्याटिङ गर्न भारतका ओपनर रोहित शर्मा र यशस्वी जैसवाल आएका थिए । आजमतुल्लाह ओमरजाईले लेग साइडमा रोहितलाई बल गर्दै एक रन दिए । गुरबाज जैसवाललाई रन आउट गर्न चुकेका थिए ।

दोस्रो बलमा जैसवालले एक रन जोडे । तेस्रो बलमा रोहित शर्माले छक्का हानेपछि बाँकी तीन बलमा ९ रन जित्न चाहिँएको थियो । चौथो बलमा रोहितले छक्का हाने । बाँकी दुई बलमा तीन रन चाहिँएको थियो ।

पाँचौं बलमा एक रन दिए । अन्तिम बलमा दुई रन चाहिँएको थियो । अन्तिम बलमा रोहित शर्माले मैदान छाड्दै रिंकुलाई मौका दिएका थिए । त्यो निर्णयमा अफगानी खेलाडी भने खुसी थिएनन् । अन्तिम बलमा एक रन दिएपछि पुन अर्को सुपर ओभर भएको थियो ।

सुपर ओभरमा अफगानिस्तानले १६ रन बनाएको थियो । सुपर ओभरमा अफगानिस्तानका गुलबदीन नैब र रहमानउल्लाह गुरबाज ब्याटिङमा आएका थिए । मुकेश कुमारले पहिलो बल गुलबदीनलाई एक रन दिए । दुई रन लिनेक्रममा गुलबदीन रन आउट भएका थिए । दोस्रो योर्कर बलमा नाबीलाई एक रन दिए ।

तेस्रो बल एज लागेर गुरबाजको थर्डमा चौका गयो । चौथो बलमा एक रन बटुलेपछि सुपर ओभरको सुरुवाती चार बलमा ७ रन जोडेको थियो ।

नाबीले पाँचौं बलमा लङअनमा छक्का हाने । अन्तिम बलमा नाबीले भारतको कमजोर फिल्डिङको फाइदा उठाउँदै तीन रन जोडेपछि सुपर ओभरमा अफगानिस्तानले १६ रन जोडेको थियो । नाबी अन्तिम बल छुन मिस भएका थिए । सन्जु स्यामसनले मुकेशलाई दिएको बल मिस गरेपछि तीन रनमा परिणत गरेका थिए ।

जितको लागि २ सय १३ रनको विशाल विजयी लक्ष्य पछ्याएको अफगानिस्तानले निर्धारित २० ओभरमा ६ विकेट गुमाउँदै २ सय १२ रन बनाएपछि खेल सुपर ओभरमा धकेलिएको थियो ।

अफगानिस्तानका गुलबदीन नैबले २३ बलमा ४ चौका र ४ छक्कासहित ५५ रनको विष्फोटक अविजित इनिङ खेल्दै सुपर ओभरमा पुर्याए । अफगानिस्तानलाई अन्तिम ओभरमा जितको लागि १९ रन चाहिँदा गुलबदीन नैबले मुकेश कुमारलाई १८ रन प्रहार गर्दै खेल सुपर ओभरमा लगेका थिए ।

अफगानिस्तानलाई अन्तिम ६ बलमा जितको लागि १९ रन चाहिँएको थियो । त्यसमा पहिलो बल वाइड र चौका दिए । दोस्रो बल मुकेश कुमारले गुलबदीन नैबलाई डट राखे । योर्करमा डट राखेका थिए । त्यसपछि पुन वाइड फाले । तेस्रो बलमा दुई र चौथो बलमा नैबले छक्का हानेपछि दुई बलमा पाँच रन चाहिँएको थियो । पाँचौं बलमा दुई रन बटुले । अन्तिम बलमा दुई रन बटुल्दै खेल सुपर ओभरमा पुर्याएका थिए ।

ओपनर रहमान उल्लाहगुरबाजले ३२ बलमा ३ चौका र ४ छक्कासहित ५० रन बनाए । कप्तान इब्राहिम जद्रान ४१ बलमा ४ चौका र १ छक्कासहित ५० रनमा आउछ भए ।

पहिलो विकेटका लागि गुरबाज र इब्राहिमले ११ ओभरमा ९३ रनको साझेदारी गर्दै राम्रो सुरुवात दिलाएका थिए । मोहम्मद नाबीले १६ बलमा २ चौका र ३ छक्कासहित ३२ रनको आक्रामक इनिङ खेले । आजमतुल्लाह ओमरजाई डक र करिम जन्नत २ रनमा आउट भए । भारतका वासिन्टन सुन्दरले ३ ओभरमा १८ रन खर्चेर ३ विकेट लिए । आवेश खान र कुलदीप यादवले १–१ विकेट लिए ।

त्यसअघि बेंगलोरको चिन्नास्वामी स्टेडियममा टस जितेर पहिला ब्याटिङ रोजेको भारतले निर्धारित २० ओभरमा ४ विकेट गुमाउँदै २ सय १२ रन बनाएको थियो । भारतका लागि कप्तान रोहित शर्माले ६९ बलमा ११ चौका र ८ छक्कासहित १ सय २१ रनको अविजित कप्तानी इनिङ खेले । फिनिसर रिंकु सिंह ३९ बलमा २ चौका र ६ छक्कासहित ६९ रनमा नट आउट रहे ।

योसँगै रोहित टि२० आई खेलमा सर्वाधिक पाँच शतक हान्ने पहिलो खेलाडी बनेका छन् । उनले सूर्यकुमार यादव र ग्लेन म्याक्सवेललाई ४-४ शतकमा पछि छाडेका छन् । रोहित सुरुवाती दुई खेलमा शून्यमा आउट भएका थिए ।

एक समय ४-३ ओभरमा २२–४ को दयनीय अवस्थामा पुगेको भारतलाई फर्काउन रोहित र रिंकुले ९५ बलमा १ सय ९० रनको विष्फोटक अविजित साझेदारी गरे । भारतले अन्तिम १२ बलमा ५८ रन जोेडेको थियो । अन्तिम ओभरमा करिम जन्नतलाई पाँच छक्कासहित कुल ३६ रन जोडेको थियो । जसमा एक नो बल र चौका पनि थियो । १९ औं ओभरमा भारतले २२ रन जोडेको थियो ।

भारतको सुरुवात सम्झन लायक रहेन । तीव्र गतिका बलर फरिद अहमदले तीन विकेट लिँदै उत्कृष्ट सुरुवात दिलाएका थिए । तीव्र गतिका बलर फरिद अहमदको तेस्रो ओभरको तेस्रो बलमा यशस्वी जैसवाल ४ रनमा मोहम्मद नाबीबाट क्याच आउट भए । लागत्तै अर्को बलमा विराट कोहली गोल्डेन डक हुँदै फर्किएका थिए ।

चौथो ओभरको अन्तिम बलमा शिमब दुबे एक रनमा क्याच आउट भए । त्यस्तै यस सिरिजमा पहिलो पटक मौका पाएका सञ्जु स्यामसन पनि गोल्डेन डक भएका छन् । फरिद अहमदको पाँचौं ओभरको तेस्रो बलमा सञ्जु मोहम्मद नाबीबाट क्याच आउट भएापछि २२–४ को अवस्थामा पुगेको थियो ।

अफगानिस्तानका फरिद अहमदले ४ ओभरमा २० रन खर्चेर ३ विकेट लिए । आजमतुल्लाह ओमरजाईले ४ ओभरमा ३३ रन खर्चेर १ विकेट लिए । भारत पहिलो र दोस्रो खेलमा ६-६ विकेटले विजयी भएको थियो ।