एजेन्सी – कप्तान रोहित शर्मा विश्व कीर्तिमानी शतकमा घरेलु टोली भारतले तेस्रो टि२० आई खेलमा अफगानिस्तानलाई २ सय १३ रनको विशाल लक्ष्य दिएकोछ । बेंगलोरमा टस जितेर पहिला ब्याटिङ रोजेको भारतले निर्धारित २० ओभरमा ४ विकेट गुमाउँदै २ सय १२ रन बनायो ।

भारतका रोहित शर्मा ६९ बलमा ११ चौका र ८ छक्कासहित १ सय २१ रनमा नट आउट रहे । रिंकु सिंह ३९ बलमा २ चौका र ६ छक्कासहित ६९ रनमा नट आउट रहे ।

योसँगै रोहित टि२० आई खेलमा सर्वाधिक पाँच शतक हान्ने पहिलो खेलाडी बनेका छन् । उनले सूर्यकुमार यादव र ग्लेन म्याक्सवेललाई ४-४ शतकमा पछि छाडेका छन् । रोहित सुरुवाती दुई खेलमा शून्यमा आउट भएका थिए । तर तेस्रो खेलमा सानदार शतक हाने ।

एक समय ४.३ ओभरमा २२–४ को दयनीय अवस्थामा पुगेको भारतलाई फर्काउन रोहित र रिंकुले ९५ बलमा १ सय ९० रनको विष्फोटक अविजित साझेदारी गरे । भारतले अन्तिम १२ बलमा ५८ रन जोेडेको थियो । अन्तिम ओभरमा करिम जन्नतलाई पाँच छक्कासहित कुल ३६ रन जोडेको थियो । जसमा एक नो बल र चौका पनि थियो । १९ औं ओभरमा भारतले २२ रन जोडेको थियो ।

भारतको सुरुवात सम्झन लायक रहेन । तीव्र गतिका बलर फरिद अहमदले तीन विकेट लिँदै उत्कृष्ट सुरुवात दिलाएका थिए । तीव्र गतिका बलर फरिद अहमदको तेस्रो ओभरको तेस्रो बलमा यशस्वी जैसवाल ४ रनमा मोहम्मद नाबीबाट क्याच आउट भए । लागत्तै अर्को बलमा विराट कोहली गोल्डेन डक हुँदै फर्किएका थिए ।

चौथो ओभरको अन्तिम बलमा शिमब दुबे एक रनमा क्याच आउट भए । त्यस्तै यस सिरिजमा पहिलो पटक मौका पाएका सञ्जु स्यामसन पनि गोल्डेन डक भएका छन् । फरिद अहमदको पाँचौं ओभरको तेस्रो बलमा सञ्जु मोहम्मद नाबीबाट क्याच आउट भएापछि २२–४ को अवस्थामा पुगेको थियो ।

अफगानिस्तानका फरिद अहमदले ४ ओभरमा २० रन खर्चेर ३ विकेट लिए । आजमतुल्लाह ओमरजाईले ४ ओभरमा ३३ रन खर्चेर १ विकेट लिए ।