काठमाडौं (हाम्रो खेलकुद) – दक्षिण अफ्रिकामा रहेको नेपालले आइसिसी यू१९ विश्वकप अघि अन्तिम अभ्यास खेलको रुपमा आज वेस्टइन्डिजसँग खेल्नेछ । नेपाल र वेस्टइन्डिजबीचको खेल दिउँसो १ बजे सुरु हुनेछ ।

दक्षिण अफ्रिकामा नेपालले आइसिसीले प्रदान गर्ने पहिलो वार्मअप खेल स्कटल्यान्डसँग खेल्दै ७ विकेटले विजयी भएको थियो । त्यसअघि नेपालले स्कटल्यान्डलाई १ सय ३५ र नामिबियालाई ६ रनले हराएको थियो । वेस्टइन्डिजसँगको खेल अन्तिम वार्मअप हो । वार्मअप हुँदा नेपालले कुनैपनि खेलाडीलाई ब्याटिङ र बलिङमा खेलाउन सक्छ ।

नेपालले यू१९ विश्वकपमा २००८ मा वेस्टइन्डिजसँग खेलेको थियो । यू१९ विश्वकपमा त्यसपछि भने वेस्टइन्डिजसँग खेलको छैन । नेपालका देव खनाल, गुलशन झा र अर्जुन कुमाल प्रमुख हतियार हुन् । यी तीन खेलाडीको प्रदर्शन निकै महत्वपूर्ण हुनेछ । सिनियर टोलीबाट खेलेका देव र गुलशनले अतिरिक्त जिम्मेवारी लिनुपर्ने हुन्छ ।

गुलशनले पहिलो अभ्यास खेलमा स्कटल्यान्डविरुद्ध शतक पनि हानेका थिए । जुन उनको करिअरको कुनैपनि खेलमा हानेको पहिलो शतक थियो । वेस्टइन्डिजका दुई खेलाडी जोशुवा डोर्नी र जेवेल एन्ड्रयु दुई प्रमुख ब्याटर हुन् । जेवेल विष्फोटक ब्याटर हुन् । नेपाललाई घातक बन्न सक्छन् । पहिलो वार्मअप खेलमा वेस्टइन्डिजले न्युजिल्यान्डलाई ६ विकेटले हराएको थियो ।

यू१९ विश्वकपमा नेपालको खेलहरु

माघ ७ (२१ जनवरी) : न्युजिल्यान्ड, बुफलो पार्क, इस्ट लन्डन

माघ १० (२४ जनवरी) : पाकिस्तान, बुफलो पार्क, इस्ट लन्डन

माघ १२ (२६ जनवरी) : अफगानिस्तान, बुफलो पार्क, इस्ट लन्डन

सबै खेल नेपाली समय अनुसार दिउँसो १ : ४५ मा सुरु हुनेछन् ।