काठमाडौं (हाम्रो खेलकुद) – त्रिभुवन आर्मी क्लबका कप्तान विनोद भण्डारीले उपाधि भन्दा पनि अनुशासन आफ्नो संस्थामा बढी महत्वपूर्ण हुने बताएका छन् । प्रधानमन्त्री कप एकदिवसीय राष्ट्रिय प्रतियोगितामा मधेश प्रदेशलाई १ सय २६ रनले हराउन शतक हानेपछि आर्मीका कप्तान विनोद भण्डारीले उक्त प्रतिक्रिया दिएका हुन् ।

आर्मी पछिल्ला दुई घरेलु प्रतियोगिता केपी ओली कपमा फाइनलमा मधेशसँग र प्रो क्लब च्याम्पियनसिपको सेमिफाइनलमा पर्सा ११सँग पराजित भएको थियो । त्यसले गर्दा उपाधि जित्न कतिको दबाब छ भन्ने प्रश्नमा विनोदले उक्त प्रतिक्रिया दिएका हुन् ।

‘उपाधि नजित्दा त्यस्तो दबाब हामीलाई छैन । हामीहरुलाई अनुशासनको कुरा मात्रै आउँछ । आर्मी भनेको अनुशासनको संस्था हो । अनुशासनमै रहनुपर्छ भन्ने कुरा हो । हार जित भइराख्छ । कहिले कस्ले जित्छ । कहिले अर्कोले । जित्नको लागि आफ्नो प्रयास गरि राखेका हुन्छौं’, आर्मीका कप्तान विनोद भण्डारीले भने ।

त्यसैमा उनले थपे, ‘कहिले के र केहिले के मिस भई राखेको हुन्छ । भाग्य पनि हो वा होईन भन्ने खालको सबैलाई भई राखेको थियो । यो पटक अली एक्स्ट्रा फोकस गरेरनै टर्फ विकेटमा अभ्यास गरेका थियौं । हेरौ नतिजा चाहिँ ।’

आर्मीलाई जिताउन उनले ९३ बलमा ९ चौका र ६ छक्कासहित १ सय १३ रनको सानदार शतकीय इनिङ खेले । उनको पिएमकपमा दोस्रो र समग्र घरेलु क्रिकेटमा चौथो शतक हो । चार मध्य तीन शतक टियु क्रिकेट मैदानमा प्रहार गरेका छन् । टियुमा विनोदले सदाबहार सानदार प्रदर्शन गर्ने गर्दछन् ।

‘प्रो क्लब खेलेर आएपछि हिमालयनमा हामीले नियमित अभ्यास गरेका थियौं । टियुमा मैदानमा अभ्यास गर्न कसैलाई अनुमति छैन । इन्डोर र नेटमा मात्रै छ । त्यसले गर्दा उता गएर टर्फ विकेटमा गएर अभ्यास गरेका थियौं । त्यहाँको विकेटपनि यस्तै समान थियो । त्यसले गर्दा पनि सजिलो भएको हो । १०-१२ दिन टर्फमा नै अभ्यास गरेर बसेका थियौं’, उनले भने ।

विनोद भण्डारीको बारे थप जानकारी : विनोद : टियु मैदानका अविरल हार्ड हिटर