काठमाडौं (हाम्रो खेलकुद) – कप्तान रोहित पौडेलको सानदार अलराउन्ड प्रदर्शनमा नेपाल एपीएफ क्लबले प्रधानमन्त्री कप एकदिवसीय राष्ट्रिय प्रतियोगितामा कोशी प्रदेशलाई ६ विकेटले हराउँदै लगातार दोस्रो जित हात पारेको छ ।

जितको लागि १ सय ३६ रनको सामान्य लक्ष्य पछ्याएको एपीएफले १९.१ ओभरमा ४ विकेट गुमाउँदै पूरा गर्यो । एपीएफको जितमा कप्तान रोहित पौडेलले ५३ बलमा ९ चौका र ३ छक्कासहित ८० रनको इनिङ खेले ।

त्यस्तै ओपनर प्रज्वल शाही २२, आसिफ शेख ४ र सुमित महर्जनले २० रन बनाए । कोशीका फिर्दोस अन्सारी, कमल खत्री, समिर कार्की र सोनु मण्डलले १–१ विकेट लिए ।

त्यसअघि माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको कोशी ४४.३ ओभरमा १ सय ३५ रनमा अल आउट भएको थियो । कोशीको लागि फिर्दोस अन्सारीले ८५ बलमा ८ चौकासहित सर्वाधिक ५५ रनको योगदान दिए । अन्य कुनैपनि कोशीका ब्याटरले राम्रो प्रदर्शन गर्न सकेनन् ।

ओपनर मिनाश थापा शून्य, कप्तान अकिंत सुवेदी १३, सोनु अन्सारी २०, आशिष भट्टराई १० र सोनु मण्डलले ११ रन बनाए । एपीएफका रोहित पौडेलले ७ ओभरमा १ मेडनसहित २४ रन खर्चेर ३ विकेट लिए । अभिनाश बोहराले ८.३ ओभरमा ३ मेडनसहित १३ रन खर्चेर ३ विकेट लिए ।

अमर सिंह राउटेलाले २, भुवन कार्की र मौसम ढकालले १–१ विकेट लिए । एपीएफले पहिलो खेलमा बागमती प्रदेशलाई ८९ रनले हराएको थियो । कोशी भने पहिलो खेलमा मधेशसँग ७ विकेटले पराजित भएको थियो ।