काठमाडौं (हाम्रो खेलकुद) – स्पिनर अजय चौहानको उत्कृष्ट बलिङमा लुम्बिनी प्रदेशले प्रधानमन्त्री कप एकदिवसीय राष्ट्रिय प्रतियोगितामा गण्डकी प्रदेशलाई ४ विकेटले हराउँदै विजयी सुरुवात गरेको छ ।

जितको लागि १ सय १२ रनको सामान्य लक्ष्य लुम्बिनीले २८.२ ओभरमा ६ विकेट गुमाउँदै पूरा गर्यो । लुम्बिनीको जितमा ओपनर मिर्नल गुरुङले ७८ बलमा ४ चौकासहित सर्वाधिक ४७ रन बनाए । मोहम्मद हुसेन २१ र विराट भण्डारीले १० रन बनाए ।

अन्य कुनैपनि ब्याटरले दोहोरो अंकमा रन बनाउन सकेनन् । गण्डकीका विपिन खत्री र कमल परियारले ३–३ विकेट लिए ।
त्यसअघि सिद्धार्थ रंगशाला भैरहवामा टस हारेर पहिला ब्याटिङको निम्तो पाएको गण्डकी प्रदेश ३४.४ ओभरमा १ सय ११ रनमा अल आउट भयो । गण्डकीका करण पंगेनी २८, कृष्ण ऐर १९, अमृत गुरुङ १३ र ओपनर समिर कँडेलले १३ रन बनाए ।

लुम्बिनीका स्पिनर अजय चौहानले ८.४ ओभरा २ मेडनसहित १६ रन खर्चेर ५ विकेट लिए । मोहम्मद हुसेनले दुई, कृष्ण कार्की, अभिषेक गौतम र नर सार्कीले १–१ विकेट लिए ।

लुम्बिनीले आफ्नो दोस्रो खेल सुदूरपश्चिमसँग सोमबार खेल्नेछ । गण्डकीले आइतबार कर्णालीसँग खेल्नेछ । आज मुलपानीमा मधेशले कोशीलाई ७ विकेटले हरायो । १० टोली सहभागी प्रतियोगिता राउन्ड रोविनको आधारमा हुनेछ ।