एजेन्सी – स्पिनर वानिन्दु हसरंगाले एक्लै ७ विकेट लिएपछि श्रीलंकाले तेस्रो ओडिआई खेलमा जिम्बाबेलाई ८ विकेटले हराएकोछ । योसँगै तीन खेलको सिरिज श्रीलंकाले २-० ले जितेकोछ ।

जितको लागि ९७ रनको सामान्य लक्ष्य पछ्याएको श्रीलंकाले १६.४ ओभरमा २ विकेट गुमाउँदै पूरा गर्यो ।
श्रीलंकाका कुशल मेन्डिस ५१ बलमा ९ चौका र १ छक्कासहित ६६ रनमा नट आउट रहे ।

जिम्बाबेका रिचर्ड न्गारावा र वेलिङ्टन मसाकाड्जाले १-१ विकेट लिए ।

त्यसअघि कोलोम्बोमा टस जितेर पहिला ब्याटिङ रोजेको जिम्बाबे २२.५ ओभरमा ९६ रनमा अल आउट भयो । जिम्बाबेका ओपनर जोयलर्ड गुम्बी २९ र तकुड्वान्शे कैतिआयो १७ रनमा आउट भए ।

एक समय ४३-० को अवस्थामा रहेपनी वर्षाको कारण पुन ब्याटिङमा फर्केपछि लगातार विकेट गुमाएको थियो ।

श्रीलंकाका वानिन्दु हसरंगाले ५.५ ओभरमा १ मेडनसहित १९ रन खर्चेर ७ विकेट लिए । यो उनको करिअरको उत्कृष्ट प्रदर्शन हो । ओडिआइ इतिहासको पाचौं उत्कृष्ट बलिङ प्रदर्शन हो ।

तीन खेलको सिरिजमा पहिलो खेल बर्षाको कारण रद्द हुँदा दोस्रो खेलमा २ विकेटले विजयी भएको थियो ।