एजेन्सी – भारतले पहिलो टि२० आई खेलमा अफगानिस्तानलाई ६ विकेटले हराएकोछ । योसँगै तीन खेलको सिरिजमा भारतले १-० को अग्रता लिएकोछ ।

जितको लागि १ सय ५९ रनको मध्यम विजयी लक्ष्य पछ्याएको भारतले १७.३ ओभरमा ४ विकेट गुमाउँदै पूरा गर्यो । भारतको जितमा शिवम दुबे ४० बलमा ५ चौका र २ छक्कासहित ६० रनमा अविजित रहे । रिंकु सिह ९ बलमा २ चौकासहित १६ रनमा नट आउट रहे ।

कप्तान रोहित शर्मालाई दोस्रो बलमै रन आउटकोरुपमा शुन्यमा गुमाएको थियो । शुभमन गिल १२ बलमा ५ चौकासहित २३ र तिलक बर्मा २२ बलमा २ चौका र १ छक्कासहित २६ रनमा आउट भए ।
जितेश शर्मा २० बलमा ५ चौकासहित ३१ रनमा आउट भए ।
अफगानिस्तानका स्पिनर मुजिब उर रहमानले ४ ओभरमा १ मेडनसहित २१ रन खर्चेर २ विकेट लिए । आजमतुल्लाह ओमरजाइले १ विकेट लिए ।

त्यसअघि मोहालीमा टस हारेर पहिला ब्याटिङको निम्तो पाएको अफगानिस्तानले निर्धारित २० ओभरमा ५ विकेट गुमाउँदै १ सय ५८ रन बनायो । अफगानिस्तानका मोहम्मद नाबीले २७ बलमा २ चौका र ३ छक्कासहित सर्वाधिक ४२ रन बनाए । आजमतुल्लाह ओमरजाईले २२ बलमा २ चौका र १ छक्कासहित २९ रन बनाए ।

ओमरजाई र नाबीले चौथो विकेटका लागि ४३ बलमा ६८ रनको महत्वपूर्ण साझेदारी गरेका थिए । नाजिबउल्लाह जद्रानले तल्लोक्रमका ११ बलमा ४ चौकासहित १९ र करिम जन्नतले ९ रन बनाए ।

ओपनर रहमानउल्लाह गुरबाज २३, इब्राहिम जद्रान २५ र रहमात शाहले ३ रन बनाए । भारतका अक्षर पटेलले ४ ओभरमा २३ रन खर्चेर २ विकेट लिए । मुकेश कुमारले ४ ओभरमा ३३ रन खर्चेर २ विकेट लिए । शिवम दुबेले १ विकेट लिए । दोस्रो खेल आइतबार हुनेछ ।