एजेन्सी – भारतीय १२ वर्षीय युवा ब्याटर वैभव सूर्यवंशीले भारतको चर्चित घरेलु क्रिकेट प्रतियोगिता खेलेका छन् ।
उनले बिहारबाट मुम्बईविरुद्ध डेब्यू गर्दै १९ र १२ रन बनाउँदै आउट भएका थिए ।

भारतबाट यू१९ प्रतियोगिता खेली सकेका बायाँ हाते उनी ओपनर ब्याटर हुन् । उनले गत सिजनको बिहारको विनोद मयंड ट्रफीमा ५ खेलमा ३ सय ९३ रन बनाएका थिए । जसमा उनले एक शतक र तीन अर्धशतक प्रहार गरेका थिए ।

उनी प्रथम श्रेणीमा डेब्यू गर्ने भारतका सबैभन्दा कम उमेरका खेलाडी हुन् । वैभवले भारतका दुई चर्चित खेलाडी युवराज सिंह र सचिन तेन्दुलकरको कीर्तिमान तोडेका छन् । युवराजले १५ वर्ष ५७ दिन र सचिनले १५ वर्ष २ सय ३ दिनमा प्रथम श्रेणीमा डेब्यू गरेका थिए । तर उनले १२ वर्ष २ सय ८४ दिनमै डेब्यू गरेका हुन् ।

गत वर्ष नै उनी भारतको यू१९ बी टोलीमा परेका थिए । उनले भारतबाट यू१९ च्यालेन्जर, चार देश सम्मिलित यू१९ सिरिज पनि खेलेका थिए । गत नोभेम्बरमा उनले भारतयी यू१९ टोलीबाट बंगलादेश र इंग्ल्यान्डविरुद्ध खेलेका थिए । उनले इंग्ल्यान्डविरुद्ध ५३ र बंगलादेशविरुद्ध ७५ रनको इनिङ खेलेका थिए ।

उनले पछिल्लो एक वर्षमा जिल्ला स्तरिय प्रतियोगितामा १० भन्दा बढी शतक प्रहार गरेको भारतीय सञ्चार माध्यमले जनाएका छन् ।