एजेन्सी – ओपनर डेविड वार्नरको टेस्ट करिअरको अन्तिम खेलमा अष्ट्रेलियाले पाकिस्तानलाई ८ विकेटले हराएको छ । तेस्रो टेस्टमा जित योसँगै तीन खेलको सिरिजमा अष्ट्रेलियाले क्लिनस्विप गरेको छ ।

जितको लागि १ सय ३० रनको सामान्य विजयी लक्ष्य पछ्याएको अष्ट्रेलियाले २ विकेट गुमाउँदै चौथो दिन पहिलो सेसनमै पूरा गर्यो । अष्ट्रेलियाको जितमा मार्नस लाबुसेन ७३ बलमा ९ चौकासहित ६२ रनमा अविजित रहे ।

वार्नर ७५ बलमा ७ चौकासहित ५७ रनमा आउट भए । वार्नरले अव अष्ट्रेलिया टोलीबाट टि२० आई मात्रै खेल्नेछन् । उनले टेस्ट र ओडिआई दुबैबाट सन्न्यासको घोषणा गरि सकेका छन् ।

उनले १ सय ११ टेस्ट खेलमा २६ शतक र ३६ अर्धशतकसहित कुल ८ हजार ६ सय ९५ टेस्ट रन बनाए । जसमा उत्कृष्ट प्रदर्शन ३ सय ३५ अविजित थियो ।

पाकिस्तान दोस्रो इनिङमा १ सय १५ रनमा अल आउट भयो । पाकिस्तानका मोहम्मद रिजवान २८, बाबर आजम २३, सैब अयुब ३३ र आमिर जामल १८ रनमा आउट भए । अष्ट्रेलियाका जोश हेजलवुडले ४ र नाथन लायनले ३ विकेट लिए ।

अष्ट्रेलिया पहिलो इनिङमा २ सय ९९ रनमा अल आउट हुँदै १४ रनले पछि परेको थियो । मार्नस लाबुसेनले सर्वाधिक ६० रनको योगदान दिए । मिचेल मार्श ५४, एलेक्स केरी र स्टिभ स्मिथ ३८–३८ रनमा आउट भए ।

ओपनर डेविड वार्नर ३४ र उस्मान खवाजाले ४७ रन बनाएका थिए । पाकिस्तानका आमिर जामलले सर्वाधिक ६ विकेट लिएका थिए । अघा सलानले दुई, सजिद खान र मिर हाम्जाले १–१ विकेट लिए ।

त्यसअघि सिड्नीमा टस जितेर पहिला ब्याटिङ रोजेको पाकिस्तान पहिलो इनिङमा ३ सय १३ रनमा अल आउट भएको थियो । पाकिस्तानका मोहम्मद रिजवानले १ सय ३ बलमा १० चौका र २ छक्कासहित सर्वाधिक ८८ रन बनाएका थिए ।

नवौं नम्बरमा ब्याटिङमा आएका आमिर जामलले ९७ बलमा ९चौका र ४ छक्कासहित एक यादगार इनिङ खेलेका थिए । अन्तिम विकेटका लागि जामलले मिर हाम्जासँग ८६ रनको साझेदारी गरेका थिए । आमिरले सानदार अलराउन्ड प्रदर्शन गरेपनि जिताउन भने सकेनन् ।

हाम्जा ४३ बलमा ७ रनमा नट आउट रहे । अघा सलमान ६७ बलमा ८ चौकासहित ५३, बाबर आजम २६, शन मसुद ३५, साउद सकिल ५, ओपनर अब्दुल्लाह शफिक र सैम अयुबले खाता खोल्न सकेनन् ।

अष्ट्रेलियाका प्याट कमिन्सले सर्वाधिक ५ विकेट लिए । मिचेल स्टार्कले दुई, जोश हेजलवुड, नाथन लायन र मिचेल मार्शले १–१ विकेट लिएका थिए ।