काठमाडौं (हाम्रो खेलकुद) – नेपाली क्रिकेट टोलीकी पूर्वकप्तान रुविना क्षेत्री बेलबासे प्रधानमन्त्री कप महिला टि२० राष्ट्रिय प्रतियोगितामा सवोत्कृष्ट खेलाडी चुनिएकी छिन् । कोशीलाई फाइनल सम्म पुर्याउन रुविनाले सानदार अलराउन्ड प्रदर्शन गरेकी थिइन् । उनले यमाह १२५ सिसीको स्कुटर प्राप्त गर्नेछिन् ।

रुविनाले यस प्रतियोगितामा १० खेलमा ३ अर्धशतकसहित कुल ३ सय ४५ रन बनाइन् । उनले ५६ चौका र ३ छक्का प्रहार गरेकी थिइन् । रुविनाले बलिङमा ११ विकेट लिएकी थिइन् ।

रुविनाले कर्णालीविरुद्ध २५ रन बनाउनुको साथै १ विकेट लिएकी थिइन् । त्यस्तै बागमतीसँग २, मधेशसँग ५७, एपिएफ ४१, गण्डकीसँग ४, सुदूरपश्चिमविरुद्ध ५१, लुम्बिनीसँग ४४, एपिएफ २२ र सुदूरपश्चिमसँग क्वालिफायरमा ४४ रन बनाएकी थिइन् ।

बलिङमा लुम्बिनीविरुद्ध ४ र गण्डकीसँग ३ विकेट लिइन् । रुविनाले दुई प्लेयर अफ द म्याच अवार्ड जितेकी छिन् । फाइनलमा रुविनाले ५८ बलमा ७ चौका र १ छक्कासहित ६२ रन र एक विकेट लिएपनि जिताउन सकेकी थिइनन् ।

उदीयमान खेलाडी गण्डकी ज्योत्स्निका मरासिनीले प्राप्त गरिन् । उनले ५० हजार बराबरको क्रिकेट सामाग्री प्राप्त गर्नेछिन् । उनले ७ खेलमा ९१ रन बनाएकी थिइन् । जसमा कर्णालीविरुद्ध ५० रनको इनिङ खेलेकी थिइन् ।

प्रतियोगिता उत्कृष्ट बलर पुजा महतो चुनिन् । पुजाले ७ खेलमा १२ विकेट लिएकी थिइन् । उनले ५० हजार प्राप्त गर्नेछिन् । उनले ७ खेलमा २६.३ ओभरमा ९६ रन खर्चेर १२ विकेट लिएकी थिइन् ।

सुमन खतिवडा उत्कृष्ट ब्याटर चुनिन् । उनले ७ खेलमा २ सय १२ रन बनाएकी थिइन् । सुमन र पुजाले समान ५० हजार प्राप्त गर्नेछन् । फाइनलमा एपिएफले कोशीलाई ११ रनले हराउँदै उपाधि जितेको थियो ।