काठमाडौं (हाम्रो खेलकुद) – सुदूरपश्चिम प्रदेशले प्रधानमन्त्री कप महिला टि२० राष्ट्रिय प्रतियोगिताको दोस्रो क्वालिफायर खेलमा कोशी प्रदेशलाई फाइनलमा पुग्न ८९ रनको मध्यम लक्ष्य दिएको छ ।

टियु क्रिकेट मैदानमा टस हारेर पहिला ब्याटिङको निम्तो पाएको सुदूरले निर्धारित २० ओभरमा ७ विकेट गुमाउँदै ८८ रन बनायो । सुदूरको लागि सम्झना खड्काले २५ बलमा ४ चौकासहित २४ रन बनाइन् । अन्य कुनैपनि ब्याटले राम्रो प्रदर्शन गर्न सकेनन् ।

ओपनर विन्दु रावल र रुवि पोदारले पहिलो विकेटका लागि ६.३ ओभरमा २६ रनको साझेदारी गर्दै मध्यम सुरुवात दिलाएका थिए । विन्दु रावल १८ बलमा ३ चौकासहित १७ रनमा रन आउट भइन् ।

संगिताले रुवी पोदारलाई ७ रनमा एलबीडब्लू आउट गरिन् । सबनम राईले १४ औं ओभरको दोस्रो बलमा सम्झना खड्कालाई आउट गरेपछि सुदूर समस्यामा परेको थियो । सम्झना एज लागेर आउट भएकी थिइन् । संगिताले उत्कृष्ट टर्न गर्दै रेवती धामीलाई ७ रनमा एलबीडब्लू आउट गरिन् ।

अनु कडायत र लक्ष्मी साउदले ७-७ रन बननाए । सावित्री धामीले २ र ऋतु कनौजिया शून्यमा आउट भइन् । कोशीको लागि संगिता राईले ४ ओभरमा १३ रन खर्चेर २ विकेट लिइन् । सबनम राई, एलिसा खडिया र निशा शाहले १-१ विकेट लिइन् ।

आजको विजेताले बुधबार एपिएफसँग फाइनल खेल्नेछ । एपिएफले पहिलो क्वालिफायरमा कोशी प्रदेशलाई ५२ रनले हराउँदै फाइनलमा पुगेको थियो । सुदूरले एलिमिनेटर खेलमा बागमती प्रदेशलाई हराउँदै दोस्रो क्वालिफायर खेलेको थियो ।