काठमाडौं (हाम्रो खेलकुद) – युवा बायाँ हाते तीव्र गतिका बलर मोहम्मद हुसेनको सानदार अलराउन्ड प्रदर्शनमा कपिलबस्तुले लुम्बिनी प्रदेश छनोटमा रुपन्देहीलाई ६१ रनले हराएको छ । सिद्धार्थ रंगशाला भैरहवामा टस जितेर पहिला ब्याटिङको निम्तो पाएको कपिलवस्तुले ४३ ओभरमा ८ विकेट गुमाउँदै १ सय ६१ रन बनाएको थियो ।

उसका लागि मोहम्मद हुसेनले ६९ बलमा १० चौकासहित सर्वाधिक ६८ रन बनाए । गोविन्द थारुले ३७ बलमा ४ चौका र १ छक्कासहित ३२, प्रतिक भट्टराई १४ रनमा आउट भए । रुपन्देहीका सन्तोष यादव र विष्णुले समान दुई विकेट लिए । कृष्ण कार्की, रुपेश कुमार, अभिषेक गौतम र अजय चौहानले १–१ विकेट लिए ।

जितको लागि १ सय ६२ रनको विजयी लक्ष्य पछ्याएको रुपन्देही ३०.१ ओभरमा १ सय रनमा अल आउट भयो । उसका लागि बिष्णु कतारियाले २८ र मर्निल गुरुङले २५ रन बनाए । मोहम्मद हुसेनले ९ ओभरमा १ मेडनसहित २० रन खर्चेर ४ विकेट लिए । साम्सली खान र राज अग्राराहीले दुई दुई विकेट लिए । शिव कुमार र गोविन्द थारुले एक एक विकेट लिए ।

लुम्बिनी प्रदेश छनोटमा समूह ए मा रुपन्देही, कपिलबस्तु, पाल्पा र नवलपरासी छन् । समूह बी मा बाँके, बर्दिया र दाङ छन् । प्रतियोगिता पुष २२ गतेसम्म चल्नेछ । माघ पहिलो साता प्रधानमन्त्री कप राष्ट्रिय प्रतियोगिता सुरु हुँदैछ । त्यसको लागि प्रदेश टिम निर्माण गर्न प्रदेश छनोट सुरु भएको छ ।