काठमाडौं (हाम्रो खेलकुद) – बागमती प्रदेशले प्रधानमन्त्री कप महिला टि२० राष्ट्रिय प्रतियोगितामा लुम्बिनी प्रदेशलाई ९ रनले हराउँदै शीर्ष चारमा रहँदै प्लेअफ खेल्ने सम्भावना बलियो बनाएको छ । जितको लागि १ सय १० रनको बलियो विजयी लक्ष्य पछ्याएको लुम्बिनीले निर्धारित २० ओभरमा ८ विकेट गुमाउँदै १ सय रन बनायो ।

लुम्बिनीको लागि कप्तान सरस्वती घर्तीमगरले ३६ बलमा ३ चौकासहित सर्वाधिक २९ रन बनाइन् । कमला घर्तीमगर २१ बलमा २ चौकासहित २० रनमा नट आउट रहिन् । ओपनर लक्ष्मी चौधरी ११ र सरस्वती पुन १७ रनमा आउट भइन् ।

बागमतीको लागि अश्मिना कर्माचार्य र खुशी डंगोलले समान दुई विकेट लिइन् । संस्कृति फुँयाल, सोनी पाख्रिन, मनिषा उपाध्यायले १-१ विकेट लिइन्।

त्यसअघि टियु क्रिकेट मैदानमा टस जितेर पहिला ब्याटिङ रोजेको बागमतीले निर्धारित २० ओभरमा ६ विकेट गुमाउँदै १ सय ९ रन बनाएको थियो । बागमतीकी हेलिसा गुरुङले ४५ बलमा ४ चौका र १ छक्कासहित सर्वाधिक ४६ ारनको योगदान दिइन् । यशु पाण्डेले ८ बलमा २ चौकासहित १२ रनमा नट आउट रहिन् ।

अन्य कुनैपनि बागमतीका ब्याटरले दोहोरो अंकमा रन बनाउन सकेनन् । एक समय १२.५ ओभरमा ६०–६ को अवस्थामा पुगेको बागमतीलाई हेलिसा र खुशी डंगोलले ३५ रनको साझेदारी गरेका थिए ।

लुम्बिनीकी शर्मिला रोकाले ४ ओभरमा १ मेडनसहित १९ रन खर्चेर सर्वाधिक ३ विकेट लिइन् । मनिषा राना, कृतिका मरासिनी, मधु डिसी र कमला जिएमले समान १–१ विकेट लिइन् ।

८ टोली सहभागी प्रतियोगिता शीर्ष चार टोली प्लेअफ खेल्नेछन् । नेपाल एपिएफ क्लब ५ खेलमा १० अंकका साथ शीर्षस्थानमा रहँदै प्लेअफमा पुगि सकेको छ । कोशी र सुदूरपश्चिम प्रदेशले ५ खेलमा ८–८ अंकका साथ दोस्रो र तेस्रो स्थानमा छन् ।
बागमती प्रदेश ५ खेलमा ३ मा जित र २ मा हारसहित ६ अंकका साथ चौथो स्थानमा छ ।

लुम्बिनी ५ खेलमा २ मा जित र ३ मा हारसहित ४ अंकका साथ पाँचौं स्थानमा छ । गण्डकी र मधेशको समान २ अंक भएपनि नेटरनरेटको कारण छैटौं र सातौं स्थानमा छन् । कर्णाली पाँच खेलमा हारका साथ पुछारमा रहँदै बाहिरिएको छ ।