काठमाडौं (हाम्रो खेलकुद) – अनुभवी स्पिनर करुणा भण्डारी, युवा अलराउन्डर राजमति ऐरी र ममता चौधरीको उत्कृष्ट प्रदर्शनमा नेपाल एपिएफ क्लबले प्रधानमन्त्री कप महिला टि२० राष्ट्रिय प्रतियोगितामा कर्णाली प्रदेशलाई ९२ रनले हराउँदै प्लेअफमा स्थान पक्का गरेको छ । एपिएफ लगातार पाँच जितका साथ प्लेअफमा पुग्ने पाहिलो टोली बनेको छ ।

जितको लागि १ सय ६१ रनको विशाल विजयी लक्ष्य पछ्याएको कर्णालीले २० ओभरमा ८ विकेट गुमाउँदै ६८ रन बनायो । कर्णालीकी तृर्सना विश्वकर्माले १९ बलमा ३ चौकासहित सर्वाधिक १९ रन बनाइन् । रश्मी खड्काले १० र गौरी बोहराले १२ रन बनाइन् । अन्य कुनैपनि ब्याटरले राम्रो प्रदर्शन गर्न सकेनन् ।

एपिएफकी स्पिनर करणा भण्डारीले ४ ओभरमा १ मेडनसहित १३ रन खर्चेर ४ विकेट लिइन् । सुमन विष्टले दुई, बिनु बढामगर र सीता रानामगरले समान एक विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ रोजेको एपिएफले निर्धारित २० ओभरमा २ विकेट गुमाउँदै १ सय ६० रन बनाएको थियो ।

एपिएफको जितमा राजमति ऐरीले ५५ बलमा ९ चौका र २ छक्कासहित ६७ रनको आक्रामक इनिङ खेलेकी थिइन् । अर्की ओपनर ममता चौधरी ५५ बलमा ८ चौकासहित ६२ रनमा रन आउट रहिन् ।

ओपनर राजमति र ममताले पहिलो विकेटका लागि १६ ओभरमा १ सय १७ रनको शतकीय साझेदारी गर्दै विशाल योगफलको आधार तय गरेका थिए । ममता रन आउट भएकी थिइन् । राजमति दुई बल बाँकी रहँदा स्पिनर तृर्सना विश्वकर्माको बलमा बोल्ड भएकी थिइन् । रोमा थापा ९ बलमा २ चौकासहित १४ र मन्जु बोकटी १ रनमा अविजित रहिन् ।

कर्णालीको लागि तृर्सना विश्वकर्माले एक विकेट लिइन् । एपिएफ ५ खेलमा १० अंकका साथ शीर्षस्थानमा छ । कोशी ५ खेलमा ४ मा जित र १ मा हारसहित ८ अंकका साथ दोस्रो स्थानमा छ । शीर्ष चार टोली प्लेअफ खेल्नेछन् ।