काठमाडौं (हाम्रो खेलकुद – अलराउन्डर पुजा महतोको अलराउन्ड प्रदर्शनमा मधेश प्रदेशले प्रधानमन्त्री कप महिला टि२० राष्ट्रिय प्रतियोगितामा गण्डकी प्रदेशलाई २७ रनले हराउँदै पहिलो जित हात पारेको छ ।

जितको लागि १ सय १३ रनको बलियो विजयी लक्ष्य पछ्याएको गण्डकी १९.४ ओभरमा ८५ रनमा अल आउट भयो । गण्डकीको लागि सुमन खतिवडाले ३३ बलमा ६ चौकासहित सर्वाधिक ४२ रन बनाइन् । सृष्टी जैसी १५ रनमा आउट हुँदा अन्य कुनैपनि ब्याटरले दोहोरो अंकमा रन बनाउन सकेनन् ।

मधेशकी पुजा महतोले ३.४ ओभरमा १ मेडनसहित ७ रन खर्चेर ३ विकेट लिइन् । सरस्वती कुमारी चौधरी, कविता गौतम र साक्षी यादवले १-१ विकेट लिइन् ।

त्यसअघि माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको मधेशले निर्धारित २० ओभरमा ७ विकेट गुमाउँदै १ सय १२ रन बनाएको थियो ।

मधेशकी ओपनर पुजा महतोले ४३ बलमा ४ चौकासहित सर्वाधिक ३८ रन बनाइन् । सरस्वती चौधरीले २१ बलमा ३ चौकासहित २६ र प्रतिमा शाहले १० रन बनाइन् ।

गण्डकीको लागि सुमन खतिवडाले २ ओभरमा १० रन खर्चेर ३ विकेट लिइन् । कुसुम गोदार र सृष्टी जैसीले १–१ विकेट लिइन् ।
मधेश बागमतीसँग २८ रन, एपिएफसँग १० विकेट र कोशीसँग ६० रनले हारेको थियो । उता गण्डकी लुम्बिनीसँग ४ विकेटले पराजित भएको थियो ।

कर्णालीलाई ४४ रनले हराउँदा बागमतीसँग ४ विकेटले हारेको थियो । ८ टोली सहभागी पिएमकप राउन्ड रोविनको आधारमा हुनेछ । शीर्ष चार टोली प्लेअफमा पुग्नेछन् ।