काठमाडौं (हाम्रो खेलकुद) – बागमती प्रदेशले प्रधानमन्त्री कप महिला टि२० राष्ट्रिय प्रतियोगितामा गण्डकी प्रदेशलाई ४ विकेटले हराउँदै दोस्रो जित हात पारेको छ ।

जितको लागि १ सय १३ रनको मध्यम लक्ष्य पछ्याएको बागमती प्रदेशले १८.४ ओभरमा ६ विकेट गुमाउँदै पूरा गर्यो । बागमतीको जितमा यसोदा विष्टले आफ्नो उच्च लयलाई निरन्तरता दिँदै ४१ बलमा ४ चौकासहित ३९ रनमा अविजित रहिन् । विजयी चौका हानेकी यशु पाण्डे ८ रनमा अविजित रहिन् ।

ओपनर हेलिसा गुरुङ १५ बलमा ४ चौकासहित २०, कन्चन श्रेष्ठ १ र सोनी पाख्रिन १७ रनमा आउट भइन् । गण्डकी सृष्टी जैशीले ४ ओभरमा २३ रन खर्चेर २ विकेट लिइन् । आकृति तिवारीले ४ ओभरमा २१ रन खर्चेर १ विकेट लिइन् ।

त्यसअघि टस जितेर पहिला ब्याटिङ रोजेको गण्डकी प्रदेशले २० ओभरमा ४ विकेट गुमाउँदै १ सय १२ रन बनाएको थियो । गण्डकीको लागि ओपनर अन्जली विश्वकर्माले ४२ बलमा ४ चौकासहित सर्वाधिक ३२ रनको योगदान दिएकी थिइन् ।

सीमाना केसी र सुमन खतिवडाले समान २८ रन बनाइन् । सुमनले २२ बलमा ३ चौका तथा सीमानाले ४१ बलमा १ चौका हानिन् । सृर्जना पौडेल ११ र ज्योत्स्निका मरासिनी १ रनमा आउट भए ।

बागमती प्रदेशको लागि कृष्मा गुरुङ, अश्मिना कर्माचार्य र मनिषा उपाध्यायले १–१ विकेट लिए । पहिलो खेलमा मधेश प्रदेशलाई २८ रनले हराउँदा कोशी प्रदेशसँग ८ विकेटले हारेको थियो । बागमतीले सोमबार सुदूरपश्चिमसँग खेल्नेछ ।
उता गण्डकी प्रदेश पहिलो खेलमा लुम्बिनीसँग ४ विकेटले पराजित भएको थियो ।

दोस्रो खेलमा गण्डकीले कर्णालीलाई ४४ रनले हराएको थियो । ८ टोली सहभागी प्रतियोगिता राउन्ड रोविनको आधारमा हुनेछ । शीर्ष चार टोली प्लेअफ खेल्नेछन् । समान ६ अंक भएपनि नेटरनरेटको कारण एपिएफ शीर्ष र कोशी दोस्रो स्थानमा छन् ।