एजेन्सी – स्पिनर गुडाकेश मोतीको उत्कृष्ट बलिङमा वेस्टइन्डिजले पाँचौं तथा अन्तिम टि२० आई खेलमा इंग्ल्यान्डलाई ४ विकेटले हराउँदै सिरिज उपाधि जितेकोछ । योसँगै पाँच खेलको सिरिज वेस्टइन्डिजले ३-२ ले जितेको हो ।

जितको लागि १ सय ३३ रनको मध्यम विजयी लक्ष्य पछ्याएको वेस्टइन्डिजले १९.२ ओभरमा ६ विकेट गुमाउँदै पूरा गर्यो । वेस्टइन्डिजको जितमा शाई होपले ४३ बलमा २ चौका र १ छक्कासहित सर्वाधिक ४३ रन बनाए । क्रिस वोक्सलाई छक्का हान्दै होपले खेल जिताएका थिए ।

शेर्फान रदरफोर्ड ३० र जोनसन चाल्र्स २७ रनमा आउट भए । आन्द्रे रसेल ३, रोभम्यान पावेल ८ र निकोलस पुरनले १० रन बनाए । इंग्ल्यान्डका स्पिनर आदिल राशिद र रिस टोप्लीले २-२ विकेट लिए ।

त्यसअघि ब्रायन लारा क्रिकेट स्टेडियममा टस हारेर पहिला ब्याटिङको निम्तो पाएको इंग्ल्यान्ड १९.३ ओभरमा १ सय ३२ रनमा अल आउट भएको थियो ।

इंग्ल्यान्डका ओपनर फिलिप साल्टले २२ बलमा ५ चौका र १ छक्कासहित सर्वाधिक ३८ रन बनाए । लियाम लिभिङस्टोन २९, जस बटलर ११, विल ज्याक्स ७, मोईन अली २३ र साम करन १२ रनमा आउट भए ।

वेस्टइन्डिजका गुडाकेश मोतीले ४ ओभरमा २४ रन खर्चेर ३ विकेट लिए । आन्द्रे रसेल, अकिल हुसेन र जेसन होल्डरले २–२ विकेट लिए ।