एजेन्सी – तीव्र गतिका बलर नान्द्रे बर्गरको उत्कृष्ट बलिङसँगै भारतले दोस्रो ओडिआई खेलमा घरेलु टोली दक्षिण अप्रिकालाई २ सय १२ रनको मध्यम लक्ष्य दिएको छ । सेन्ट जर्ज पार्कमा टस हारेर पहिला ब्याटिङको निम्तो पाएको भारत ४६.२ ओभरमा २ सय ११ रनमा अल आउट भयो ।

भारतका लागि आफ्नो करिअरको दोस्रो खेल खेलेका ओपनर साइ सुदर्शनले ८३ बलमा ७ चौका र १ छक्कासहित सर्वाधिक ६२ रन बनाए । आफ्नो ओडिआई करिअरको सुरुवाती दुबै खेलमा उनले अर्धशतक प्रहार गरेका हुन् ।

कप्तान लोकेश राहुलले ६४ बलमा ७ चौकासहित ५६ रन बनाए । अन्य कुनैपनि भारतीय ब्याटरले राम्रो प्रदर्शन गर्न सकेनन् । ओपनर ऋतुराज गायकवाड ४, तिलक बर्मा १०, सन्जु स्यामसन १२, रिंकु सिंह १७ र अक्षर पटेल ७ रनमा आउट भए ।

दक्षिण अफ्रिकाका नान्द्रे बर्गरले १० ओभरमा ३० रन खर्चेर ३ विकेट लिए । बेउरान हेन्ड्रिक्स र केशव महाराजले दुई दुई विकेट लिए । कप्तान एडेन माक्ररम र लिजाड विलियम्सको नाममा १-१ विकेट् रह्यो । तीन खेलको ओडिआई सिरिजमा भारतले १-० को अग्रता लिएको छ ।