एजेन्सी – अष्ट्रेलिया बायाँ हाते तीव्र गतिका बलर स्पेन्सर जोनसनलाई इन्डियन प्रिमियर लिग (आइपिएल) २०२४ को अक्सनमा गुजरात टाइटन्सले १० करोड भारु (१६ करोड नेपाली रुपैयाँ) मा किनेको छ । दुबईमा जारी अक्सनमा न्यूनतम ५० लाख भारु राखेपनि दिल्ली र गुजरातबीच कडा प्रतिस्पर्धा हुँदा १० करोड भारुमा गुजरातमा पुगेका हुन् ।

२८ वर्षीय जोनसन तीव्र गति र स्वींगका लागि चिनिन्छन् । विदेशी लिगमा सानदार प्रदर्शन गर्दै आएका उनले गत अगष्टमा दक्षिण अफ्रिकाविरुद्ध टि२० आईमा डेब्यू गरेका थिए । उत्कृष्ट गति र स्वींग हुँदा उनले महँगो मूल्य पाएका हुन् ।

उनी जारी अक्सनमा १० करोडमाथि मूल्यमा बिक्ने तेस्रो अष्ट्रेलियन खेलाडी हुन् । यसअघि अष्ट्रेलियाका तीव्र गतिका बलर मिचेल स्टार्कलाई कोलकाता नाइट राइडर्सले आइपिएल इतिहासकै सर्वाधिक सर्वाधिक महँगो मूल्य २४ करोड ७५ लाख भारु झन्डै ४० करोड नेपाली रुपैयाँमा किनेको थियो ।

त्यस्तै अष्ट्रेलियाका अर्का तीव्र गतिका बलर प्याट कमिन्सलाई सनराइर्ज हैदराबादले २० करोड ५० लाख भारु झण्डै ३३ करोड नेपाली रुपैयाँमा किनेको थियो । ट्रविस हेडलाई हैदराबादले ६ करोड ८० लाख भारुमा किनेको थियो ।

त्यस्तै अष्ट्रेलियाका अर्का तीव्र गतिका बलर झेय रिचर्डसनलाई दिल्लीले ५ करोड भारुमा किनेको छ । अघिल्लो महिना भारतलाई हराउँदै एकदिवसीय विश्वकप उपाधि जितेपछि अष्ट्रेलियाका खेलाडी पहिलो रोजाईमा परेका छन् ।