काठमाडौं (हाम्रो खेलकुद) – दुई सातापछि हुने प्रधानमन्त्री कप महिला टि२० राष्ट्रिय प्रतियोगिताको लागि भएको बागमती प्रदेश छनोट अन्तर्गत इलिट ट्रफीको उपाधि बागमती रेडले जितेको छ । सोमबार फाइनलमा रेडले बागमती ग्रीनलाई ३४ रनले हराउँदै बागमती इलिट ट्रफीको उपाधि जितेको हो ।

तल्लोमुलपानी क्रिकेट मैदानमा पहिला ब्याटिङ थालेको रेडले निर्धारित २० ओभरमा ३ विकेट गुमाउँदै १ सय ४४ रन बनाएको थियो । बागमतीको लागि ओपनर हेलिसा गुरुङले ६८ बलमा सर्वाधिक ७८ रन बनाइन् । अर्की ओपनर अस्मिता खरेलले ४२ बलमा ३६ रन बनाएकी थिइन् ।

ग्रीनको लागी तीव्र गतिकी बलर विपिशा शाहीले ४ ओभरमा ३३ रन खर्चेर २ विकेट लिइन् । जितको लागि १ सय ४५ रनको विजयी लक्ष्य पछ्याएको ग्रीनले निर्धारित २० ओभरमा ८ विकेट गुमाउँदै १ सय १० रन बनायो ।

ग्रीनकी ओपनर तथा कप्तान कन्चन श्रेष्ठले ४४ बलमा सर्वाधिक ३२ रन बनाइन् । श्रीजा घिमिरले १४ बलमा १२ रन बनाइन् । रेडका लागि पार्वती खत्र्री र मनिषा उपाध्ययले समान दुई विकेट लिए ।

ग्रीनकी कप्तान कन्चन श्रेष्ठ प्रतियोगिता उत्कृष्ट ब्याटर चुनिन् । विपिशा शाही ७ विकेटका साथ उत्कृष्ट बलर चुनिन् । हेलिसा गुरुङ प्रतियोगिता सर्वोत्कृष्ट (प्लेयर अफ द सिरिज) चुनिएकी थिइन् । रेडलाई उपाधि जिताउन उनले दुई अर्धशतकसहित कुल १ सय ६२ रन बनाएकी थिइन् ।

बागमती प्रदेशको आयोजना र बागमती प्रदेश खेलकुद परिषद्को आर्थिक सहयोगमा प्रधानमन्त्री कपको लागि छनोट भएको छ । बागमती प्रदेशले चार जिल्लाबीच छनोट चितवनमा गराएको थियो ।

बागमती प्रदेश छनोटको उपाधि काठमाडौंले जितेको थियो । काठमाडौं, भक्तुपर, ललितपुर र चितवन बागमती प्रदेश छनोटमा सहभागी भएका थिए । प्रतियोगिता लिगको आधारमा भएको थियो ।

इलिट ट्रफीमा बागमती प्रदेशमा उत्कृष्ट प्रदर्शन गर्ने खेलाडीबाट तीन टोली, रेड, ब्ल्यू र ग्रीन गरि टिम निर्माण गरि सिंगल राउन्ड रोविनको आधारमा इलिट ट्रफीको गरिएको थियो । बागमतीले अव नेपाल एपिएफ क्लबसँग तीन टि२० म्याचको सिरिज मंसिर २७, २८ र २९ मा खेल्नेछ । त्यसपछि पुष १ देखी सुरु हुने प्रधानमन्त्री कपमा सहभागीता जनाउनेछ ।