काठमाडौं (हाम्रो खेलकुद) – नेपाली क्रिकेट टोलीका युवा अलराउन्डर दीपेन्द्रसिंह ऐरी इन्डियन प्रिमियर लिग (आइपिएल) २०२४ को अक्सनमा बिक्ने सम्भावना धेरै छ । पछिल्लो समय अन्तर्राष्ट्रिय क्रिकेटमा गरेको प्रदर्शनले उनको सम्भावना बढाएको हो । आइपिएल अक्सन डिसेम्बर १९ मा हुँदैछ ।

आइपिएलले दर्ता हुने खेलाडी हुँदै सर्ट लिष्ट सार्वजनिक गर्न बाँकी छ । सर्टलिष्टमा पर्ने खेलाडी अक्सनमा जानेछन् । यदि सर्ट लिष्टमा छुटेको खण्डमा कुनै फ्रेन्चाइज टोलीको आग्रहमा अक्सनमा राख्नसक्छ ।

दीपेन्द्रले १९ औं एसियाली खेलकुदमा मंगोलियाविरुद्ध ९ बलमै अर्धशतक हानेपछि झनै सम्भावना बढेको हो । उक्त दुर्लभ कीर्तिमान अव कहिल्यै तोडिने छैन । युवराज सिंहको कीर्तिमान तोड्दै उक्त विश्व कीर्तिमानपछि आइपिएलका फ्रेन्चाइज टोलीले दीपेन्द्रलाई टोलीमा किन्न थप आर्कषित भएका छन् ।

एसियाली खेलकुदको क्वाटरफाइनलमा भारतविरुद्ध दीपेन्द्रले शतक बनाएका यशस्वी जैसवाल र कप्तान ऋतुराज गायकवाडलाई आउट गर्दै ४ ओभरमा ३१ रन खर्चेर २ विकेट लिदै बलिङमा राम्रो प्रभाव छाडेका थिए । ब्याटिङमा दीपेन्द्रले भारतविरुद्ध १५ बलमा ४ छक्कासहित ३२ रनको आक्रामक इनिङ खेलेका थिए ।

शिवम दुबेलाई १४ औं ओभरमा दीपेन्द्रले लगातार तीन छक्का हानेका थिए । एसिया कपमा दीपेन्द्रले २५ बलमा ३ चौकासहित २९ रन बनाएका थिए । फ्रेन्चाइज लिगमा पनि दीपेन्द्रले आफ्नो प्रभाव छाडि सकेका छन् । ग्लोबल टि२० क्यानडामा मोन्टिरिएल टाइगर्सलाई च्याम्पियन बनाउन दीपेन्द्रले ब्याटिङ, बलिङ र फिल्डिङ तीनै क्षेत्रमा उत्कृष्ट प्रदर्शन गरेका थिए । टि२० आईमा उनको आकाँडा पनि त्यतिनै राम्रो छ ।

दीपेन्द्रले ५३ टि२० आई खेलमा १ शतक र ७ अर्धशतकसहित कुल १३ सय ४४ रन बनाउनुको साथै २५ विकेट लिएका छन् । आइपिएलमा दीपेन्द्रलाई तल्लोक्रममा स्पिन अलराउन्डरको रुपमा खेलाउने उदेश्यका साथ फ्रेन्चाइज टोलीले किन्ने सम्भावना छ ।
दीपेन्द्रले ब्याटिङ, बलिङ र फिल्डिङ सबैमा विश्वस्तरिय प्रदर्शन गर्दै आएका छन् । १० फ्रेन्चाइज टोलीका सबैको खेलाडी आवश्यकता हेर्दा यी पाँच टोलीले किन्न सक्छन् ।

५.रोयल च्यालेन्जर्स बेंगलोर

बेंगलोरले यसपटक डेविड विल्ली, फिन एलेन, जोश हेजलवुड, माइकल ब्रेसवेल, वानिन्दु हसरंगा र वेन पार्नेललाई टोलीबाट फुकुवा गरेको थियो । ब्रेसवेल र हसरंगा दुबैलाई स्पिन अलराउन्डरको रुपमा टोलीमा राखेको थियो ।

हसरंगा र ब्रेसवेलको विकल्पमा दीपेन्द्रलाई टोलीमा भित्र्याउन सक्छ । बेंगलोरको नजर अक्सनमा तीव्र गतिका बलर मिचेल स्टार्कमा हुनेछ । तर स्टार्कलाई किन्न धेरै टोलीले प्रयास गर्नेछन् । अक्सनमा स्टार्कमाथि धनको वर्षा हुनसक्छ । बेंगलोरले स्टार्कलाई महँगो मूल्य हाल्दा दीपेन्द्रलाई कम मूल्यमा भित्र्याउन सक्छ ।

४.मुम्बई इन्डियन्स

दीपेन्द्रलाई पाँच पटकको च्याम्पियन मुम्बई इन्डियन्सले पनि अक्सनमा मूल्य लगाउन सक्छ । मुम्बईले ३ विदेशी खेलाडी किन्न पाउनेछ । मुम्बईमा प्रमुख स्पिनर टोलीमा छैनन् । तिलक बर्मा पार्टटाइम स्पिनर हुन् । तल्लोक्रम ब्याटिङ मजबुत गराउन दीपेन्द्रलाई विकल्पमा सोच्न सक्छ ।

मुम्बईसँग अक्सनमा खर्च गर्न पाउने रकम १५ करोड २५ लाख भारु मात्रै छ । जसबाट अक्सनमा आफूलाई आवश्यक पर्ने तीन विदेशीसँगै भारतीय खेलाडी पनि किन्नुपर्ने हुन्छ । दीपेन्द्र अफ स्पिनसँगै ब्याटिङ राम्रो गर्ने हुँदा मुम्बईले मूल्य लगाउन सक्छ ।

३. दिल्ली क्यापिटल्स

दिल्ली क्यापिटल्स आइपिएलमा पहिलो नेपाली खेलाडी किन्ने फ्रेन्चाइज टोली हो । २०१८ मा दिल्लीले सन्दीपलाई २० लाख भारुमा किनेको थियो । यस पटकको अक्सनमा दिल्लीले चार विदेशी खेलाडी किन्न पाउनेछ ।

दीपेन्द्रसिंह ऐरी पनि दिल्लीको रोजाईमा पर्न सक्छन् । दिल्लीको घरेलु मैदान फिरोज शाह कोटला स्पिनर सहयोगी मैदान हो । जसले गर्दा दीपेन्द्रलाई किन्नसक्छ । पछिल्लो समय दिल्लीको तल्लोक्रम ब्याटिङ राम्रो हुन सकेको छैन ।

२.कोलकाता नाइट राइडर्स

कोलकाता नाइट राइडर्सले आइपिएलमा दीपेन्द्रलाई अक्सनमा मूल्य लगाउन सक्ने सम्भावना रहन्छ । कोलकाताले डेविड विजा, जोहनसन चाल्र्स, लिटन दास, लोकी फर्गुसन, सकिब अल हसन र टिम साउथीलाई टोलीबाट फुकुवा गरेको थियो । सकिबको राम्रो विकल्प दीपेन्द्र बन्नसक्छन् ।

१.राजस्थान रोयल्स

यस पटक अक्सनमा राजस्थान रोयल्सले नेपाली खेलाडी किन्ने सम्भावना रहन्छ । नेपालले दुई महिना अघि टि२० विश्वकप एसिया क्षेत्र छनोट अघि राजस्थान रोयल्सको एकेडेमीमा गएर अभ्यास गरेको थियो ।

राजस्थान रोयल्सको एकेडेमीसँग अभ्यास खेल समेत खेलेको थियो । जसले गर्दा राजस्थानले नेपाली खेलाडीलाई नजिकबाट हेर्ने मौका पाएको थियो । त्यहाँ प्रभावित पार्ने नेपाली खेलाडीलाई राजस्थानले किन्न खोज्नेछ ।

अर्कोतर्फ नेपालका मुख्य प्रशिक्षक मोन्टी देशाईले राजस्थान रोयल्समा २००८ देखी २०१५ सम्म सहायक प्रशिक्षकको रुपमा काम गरेका थिए । मोन्टीको राजस्थानका प्रशिक्षक, खेलाडी र मालिकसँग राम्रो सम्बन्ध पनि छ ।

मोन्टीको आग्रहमा राजस्थानले दीपेन्द्रसहित अन्य केहि नेपाली खेलाडीलाई किन्नसक्छ । राजस्थानले विदेशी खेलाडीको रुपमा जेसन होल्डर, जो रुट र ओबेद म्याककोेयलाई फुकुवा गरेको थियो ।