एजेन्सी – युगान्डाले टेस्ट टोली जिम्बावेलाई पछि पार्दै आफ्नो क्रिकेट इतिहासमा पहिलो पटक विश्वकपमा पुगेको छ । नामिबियामा जारी आइसिसी टि२० विश्वकप अफ्रिका छनोटमा युगान्डाले रवान्डालाई ९ विकेटले हराउँदै शीर्ष दुई रहँदै २०२४ मा टि२० विश्वकप खेल्ने पक्का भएको हो ।

युगान्डा सिनियर स्तरको प्रतियोगितामा पहिलो पटक विश्वकपमा पुगेको हो । यू१९ टोलीले तीन पटक विश्वकप खेलेपनि सिनियर टोलीले खेल्न सकेको थिएन । जितको लागि ६६ रनको विजयी लक्ष्य युगान्डाले ८.१ ओभरमा १ विकेट गुमाउँदै पूरा गर्यो ।

अफ्रिका छनोटबाट एक खेल अगावमै लगातार ५ जितका साथ नामिबिया विश्वकपमा पुगेको थियो । युगान्डा ६ खेलमा ५ मा जितका साथ १० अंकका साथ दोस्रो स्थानमा रहँदै विश्वकप खेल्यो । उता जिम्बावेले अन्तिम खेल केन्यासँग खेलि राखेको छ । उक्त खेलमा जिम्बावे विजयी हुँदा मात्रै ८ अंक हुनेछ । त्यसैको कारण युगान्डा विश्वकपमा पुगेको हो ।

जिम्बावे नामिबिया र युगान्डासँग पराजित भएको थियो । यी दुई हार जिम्बावेलाई भारी परेका हुन् । योसँगै आगमी वर्ष अमेरिका र वेस्टइन्डिजमा जुनमा हुने टि२० विश्वकप खेल्ने सबै २० टोलीको टुङ्गो लागेको छ ।

२०२४ को विश्वकप खेल्ने २० टोली :

अमेरिका, वेस्टइन्डिज, अष्ट्रेलिया, इंग्ल्यान्ड, भारत, नेदरल्यान्ड्स, न्युजिल्यान्ड, पाकिस्तान, दक्षिण अफ्रिका, श्रीलंका, अफगानिस्तान, बंगलादेश, आयरल्यान्ड, स्कटल्यान्ड, पपुवा न्युगिनी, क्यानडा, नेपाल, ओमान, नामिबिया र युगान्डा ।