एजेन्सी – न्युजिल्यान्डका प्रमुख ब्याटर केन विलियम्सनले घरेलु टोली बंगलादेशविरुद्ध पहिलो टेस्ट खेलमा शतक प्रहार गरेका छन् । दोस्रो दिनको खेल सकिँदा न्युजिल्यान्ड पहिलो इनिङमा २६६–८ को अवस्थामा छ । न्युजिल्यान्ड पहिलो इनिङमा ४४ रनले पछिछ ।

केन विलियम्सनले २ सय ५ बलमा ११ चौकासहित १ सय ४ रनको शतकीय इनिङ खेले । उनको यो टेस्ट करिअरको २९ औं शतक हो । ग्लेन फिलिप्स ६२ बलमा ५ चौका र १ छक्कासहित ४२ तथा डर्याल मिचेल ५४ बलमा ३ चौका र १ छक्कासहित ४१ रनमा आउट भए ।

ओपनर टम लाथम २१, डेभन कन्वे १२ र हेनरिक निकोलस १९ रनमा आउट भए । काइल जेमिसन ७ र कप्तान टिम साउथी १ रनमा क्रिजमा छन् । बंगलादेशका ताइजुल इस्लामले सर्वाधिक चार विकेट लिए ।

त्यसअघि पहिलो इनिङमा सिलायटमा टस जितेर पहिला ब्याटिङ रोजेको बंगलादेश ३ सय १० रनमा अल आउट भएको थियो । बंगलादेशका ओपनर मोहम्मद हसन जोयले १ सय ६६ बलमा ११ चौकासहित सर्वाधिक ८६ रनको योगदान दिए । जकिर हसन १२, मेहेदी हसन मिराज २४, नुरुल हसन २९, नाज्मुल हसन सान्टो र मोमिनुल हक ३७–३७ रनमा आउट भए ।

न्युजिल्यान्डका स्पिनर ग्लेन फिलिप्सले सर्वाधिक ४ विकेट लिए । जेमिसन र अजाज पटेलले २–२ विकेट लिए । यी दुई देशबीच दुई टेस्ट खेलको सिरिज हुनेछ । दोस्रो टेस्ट ६ डिसेम्बर देखी ढाकामा सुरु हुनेछ ।