एजेन्सी – गुजरात टाइटन्सका कप्तान हार्दिक पान्ड्या इन्डियन प्रिमियर लिग (आइपिएल) २०२४ मा मुम्बई इन्डियन्स फर्किएका छन् । गुजरातले हार्दिकलाई टोलीमा रिटेन गरेपनि खेलाडी ट्रेडबाट हार्दिक मुम्बई फर्किएका हुन् ।

हार्दिकलाई मुम्बईले २०२२ को मेघा अक्सनमा टोलीबाट फुकुवा गरेको थियो । त्यसै वर्ष उनलाई गुजरातले १५ करोड भारुमा टोलीमा अनुबन्ध गर्दै कप्तान बनाएको थियो । हार्दिकको कप्तानीमा डेब्यू सिजनमै गुजरातले उपाधि जितेको थियो । २०२३ को फाइनलमा चेन्नईसँग पराजित भएको थियो । हार्दिकलाई २०१५ को अक्सनमा मुम्बईले १० लाख भारुमा किनेको थियो ।

त्यसपछि हार्दिकले २०२१ सम्म मुम्बईबाट खेलेका थिए । उनको उत्कृष्ट अलराउन्ड प्रदर्शनको सहयोगमा मुम्बईले २०१५, २०१७, २०१९ र २०२० मा उपाधि जितेको थियो । मुम्बईले हार्दिकलाई फुकुवा गरेपछि पछिल्ला दुबै सिजनमा अपेक्षा अनुसार प्रदर्शन गर्न सकेको छैन ।

उता गतवर्ष अक्सनमा मुम्बईले अष्ट्रेलियाका अलराउन्डर क्यामरन ग्रीनलाई १७ करोड ५० लाख भारु (२८ करोड नेपाली रुपैयाँ) मा किनेको थियो । उनलाई मुम्बईले ट्रेड गर्दै बेंगलोर पठाएको छ । अव ग्रीनले बेंगलोरबाट खेल्ने छन् ।

मुम्बईले हार्दिकलाई भित्र्याउन जोफ्रा आर्चरलाई टोलीबाट फुकुवा गरेको थियो । आर्चरलाई २०२१ को अक्सनमा मुम्बईले ८ करोड भारुमा किनेको थियो । मुम्बईले क्रिस जोर्डन, डुवान यानसन, हृथिक शोकीन, झेय रिचर्डसन, मोहम्मद अर्शद खान, रगाव गोयल, रमनदीप सिंह, राइली मेरेडीथ, सन्दीप वारियर र ट्रिस्टन स्टब्सलाई टोलीबाट फुकुवा गर्दै अक्सनमा पठाएको छ ।

मुम्बईले टोलीमै राखेका खेलाडी :

आकाश माधवाल, अर्जुन तेन्दुलकर, डेवाल्ड ब्रेभिस, ईशान किशन, जेसन बेहरनडोफ, जस्प्रित बुमराह, कुमार कार्तिकेय सिंह, तिलक बर्मा, नेवाल वढेरा, पियुष चवाला, रोहित शर्मा, शाम्स मुलानी, सुर्यकुमार यादव, टिम डेविड र विस्नु विनोद ।