एजेन्सी – ओपनर क्विन्टन डि कक र शीर्षक्रमका ब्याटर रास्सी भान डर डुसेनको सानदार शतकमा दक्षिण अफ्रिकाले आइसिसी विश्वकप २०२३ मा न्युजिल्यान्डलाई ३ सय ५८ रनको विशाल लक्ष्य दिएको छ । पुणेमा टस हारेर पहिला ब्याटिङको निम्तो पाएको दक्षिण अफ्रिकाले निर्धारित ५० ओभरमा ४ विकेट गुमाउँदै ३ सय ५७ रन बनायो ।

दक्षिण अफ्रिकाका रास्सी भान डर डुसेनले १ सय १८ बलमा ९ चौका र ५ छक्कासहित सर्वाधिक १ सय ३३ रन बनाए । अर्का ओपनर क्विन्टन डि ककले १ सय १६ बलमा १० चौका र ३ छक्कासहित १ सय १४ रनको शतकीय इनिङ खेले ।

जारी विश्वकपमा डि ककको चौथो र डुसेनको दोस्रो शतक हो । डि ककले यसअघि यस विश्वकपमा श्रीलंकाविरुद्ध १ सय, अष्ट्रेलियाविरुद्ध १ सय ९ र बंगलादेशविरुद्ध १ सय ७४ रनको सानदार शतकीय इनिङ खेलेका थिए ।

एकै विश्वकपमा भारतका रोहित शर्माले २०१९ मा पाँच र श्रीलंकाका कुमार संगाकाराले २०१५ को विश्वकपमा चार शतक हानेका थिए ।

दोस्रो विकेटका लागि डि कक र डुसेनले २ सय रनको दोहोरो शतकीय साझेदाारी गरेका थिए । डि कक टिम साउथीको बलमा कट खेल्नु धुनमा प्वाइन्टमा ग्लेन फिलिप्सबाट क्याच आउट भए । साउथीकै स्वलो बलमा डुसेन बोल्ड आउट भएका थिए ।

ओपनर टेम्बा बभुमा भने २८ बलमा ४ चौका र १ छक्कासहित २४ रनमा आउट भएका थिए । फिनिसर डेविड मिलरले ३० बलमा २ चौका र ४ छक्कासहित ५३ रन गराउँदै राम्रो अन्त्य गरे ।

हेनरिक क्लासेन १५ र एडेन माक्ररम ६ रनमा अविजित रहे । न्युजिल्यान्डका टिम साउथीले १० ओभरमा ७७ रन खर्चेर २ विकेट लिए । ट्रेन्ट बोल्ट १० ओभरमा १ मेडनसहित ४९ रन खर्चेर १ विकेट लिए । जेम्श निसमले एक विकेट लिए ।