एजेन्सी – दक्षिण अफ्रिकाका ओपनर क्विन्टन डि ककले आइसिसी विश्वकप २०२३ मा न्युजिल्यान्डविरुद्ध शतक हानेका छन् । डिककले १ सय ३ बलमा शतक पूरा गरेका हुन् । जारी विश्वकपमा उनको यो चौथो शतक हो ।

उनले यसअघि यस विश्वकपमा श्रीलंकाविरुद्ध १ सय, अष्ट्रेलियाविरुद्ध १ सय ९ र बंगलादेशविरुद्ध १ सय ७४ रनको सानदार शतकीय इनिङ खेलेका थिए । एकै विश्वकपमा सर्वाधिक शतक भारतका रोहित शर्माको नाममा छ । रोहित शर्माले २०१९ को विश्वकपमा पाँच शतक हानेका थिए ।

श्रीलंकाका कुमार संगाकाराले २०१५ को विश्वकपमा चार शतक हानेका थिए । अन्य कुनैपनि ब्याटरले एकै विश्वकपमा चार शतक हानेका छैनन् । डि कक एकै विश्वकपमा चार शतक हान्ने विश्वका तेस्रो र दक्षिण अफ्रिकाका पहिलो खेलाडी हुन् ।

पुणेमा टस हारेर पहिला ब्याटिङको निम्तो पाएको दक्षिण अफ्रिकाले ३७ ओभरमा १ विकेट गुमाउँदै २ सय १४ रन बनाएको छ । डि कक १ सय ५ बलमा ८ चौका र ३ छक्कासहित १ सय २ रनमा क्रिजमा छन् ।

रास्सी भान डर डुसेन ८९ बलमाा ६ चौका र २ छक्कासहित ८१ रनमा क्रिजमा छन् । दोस्रो विकेटका लागि १ सय ७२ बलमा १ सय ७७ रनको साझेदारी गरि सकेका छन् ।