एजेन्सी – साविक विजेता इंग्ल्यान्ड आइसिसी विश्वकप २०२३ मा घरेलु टोली भारतसँग १ सय रनको लज्जास्पद हारसँगै लिगबाटै बाहिरिने पक्कापक्की भएको छ । लिगबाट बाहिरिन इंग्ल्यान्डको औपचारिकता मात्रै बाँकी छ । भारत भने ६ खेलमा १२ अंकका साथ सेमिफाइनल नजिक पुगेको छ ।

जितको लागि २ सय ३० रनको मध्यम विजयी लक्ष्य पछ्याएको इंग्ल्यान्ड ३४.५ ओभरमा १ सय २९ रनमा अल आउट भयो । इंग्ल्यान्डका लियाम लिभिङस्टोनले ४६ बलमा २ चौकासहित सर्वाधिक २७ रन बनाए । कुनैपनि ब्याटरले राम्रो प्रदर्शन गर्न सकेनन् ।
इंग्ल्यान्डलाई ओपनर डेविड मलान र जोनी बेयरस्टोले ४.५ ओभरमा ३० रन जोड्दै राम्रो सुरुवात दिलाएका थिए । तीव्र गतिका बलर जस्प्रित बुमराहले मलानलाई १७ रनमा बोल्ड आउट गरे । मलानले १७ बलमा २ चौका र १ छक्का प्रहार गरे ।

लगत्तै अर्को बलमा जो रुट एलबीडब्लू आउट हुँदै गोल्डेन डक आउट भए । आठौं ओभरको अन्तिम बलमा मोहम्मद शामीले बेन स्टोक्सलाई शून्यमा बोल्ड गरे । शामीले नै अर्को ओभरमा जोनी बेयरस्टोलाई १४ रनमा बोल्ड आउट गरेपछि इंग्ल्यान्ड ९.१ ओभरमा ३९-४ को अवस्थामा पुगेको थियो ।

कुलदीप यादवले जस बटलरलाई १० रनमा बोल्ड आउट गरेपछि इंग्ल्यान्डको जितको सम्भावना सकिएको थियो । डेविड विल्लीले १६ र आदिल राशिदले १३ रन बनाए ।

भारतका मोहम्मद शाममीले ७ ओभरमा २ मेडनसहित २२ रन खर्चेरर ४ विकेट लिए । जस्प्रित बुमराहले ६.५ ओभरमा १ मेडनसहित ३२ रन खर्चेर ३ विकेट लिए । कुलदीप यादवले २ र रविन्द्र जडेजाले एक एक विकेट लिए ।

त्यसअघि लखनऊमा टस हारेर पहिला ब्याटिङको निम्तो पाएको भारतले ५० ओभरमा ९ विकेट गुमाएर २ सय २९ रन बनाएको थियो। भारतका कप्तान रोहित शर्मालले १ सय १ बलमा १० चौका र ३ छक्कासहित सर्वाधिक ८७ रनको योगदान दिए ।

स्पिनर आदिल राशिदको ३७ औं ओभरको पाँचौं बलमा रोहित लङअनमा क्याच आउट भएपछि शतक बनाउन चुकेका थिए । रोहितबाहेक केएल राहुलले ३९ रन र सूर्यकुमार यादवले ४९ रनको योगदान दिए ।

ओपनर शुभमन गिललाई क्रिस वोक्सले चौथो ओभरको अन्तिम बलमा ९ रनमा बोल्ड आउट गरे । डेविड विल्लीको सातौं ओभरको पाँचौं बलमा विराट कोहली मिडअफमा शून्यमा क्याच आउट भएका थिए । वोक्सको बाउन्सर बलमा श्रेयस ऐर ४ रनमा क्याच आउट भएका थिए ।

एक समय ११.५ ओभरमा ४०-३ को अवस्थामा पुगेका भारतलाई चौथो विकेटका लागि रोहित र लोकेश राहुलले ९१ रनको साझेदारी गरेका थिए । विल्लीको बलमा ठूलो सर्ट खेल्ने धुनमा राहुल टप एज लागेर मिडअनमा जोनी बेयरस्टोबाट क्याच आउट भएका थिए । उनले ५८ बलमा ३ चौकासहित ३९ रन बनाए ।

रविन्द्र जडेजा ८ र मोहम्मद शामी १ रनमा आउट भएका थिए । तल्लोक्रमका सूर्यकुमार यादव ४७ बलमा ४ चौका र १ छक्कासहित ४९ रनमा क्याच आउट भएका थिए ।

इंग्ल्यान्डका आदिल राशिदले १० ओभरमा ३५ रन खर्चेर २ विकेट लिए । डेविड विल्लीले १० ओभरमा २ मेडनसहित ४५ रन खर्चेर ३ विकेट लिए ।

भारत ६ खेलमा १२ अंकका साथ शीर्षस्थानमा छ । इंग्ल्यान्ड ६ खेलमा १ मा जित र ५ मा हारसहित २ अंकका साथ पुछारमा छ । इंग्ल्यान्डले अव अष्ट्रेलिया, नेदरल्यान्ड्स र पाकिस्तानसँग खेल्नेछ । बाँकी सबै खेल जितेपनि इंग्ल्यान्डको मात्रै ८ अंक हुनेछ । ८ अंक अन्तिम चारमा रहेर सेमिफाइनलमा पुग्न पर्याप्त देखिदैन ।

दक्षिण अफ्रिका ६ खेलमा ५ मा जित र १ मा हार सहित १० अंकका साथ दोस्रो स्थानमा छ । न्युजिल्यान्ड ६ खेलमा ४ मा जित र २ मा हारसहित ८ अंकका साथ तेस्रो स्थानमा छ । अष्ट्रेलिया ६ खेलमा ४ मा जित र २ मा हारसहित ८ अंकका साथ चौथो स्थानमा छ ।