काठमाडौं (हाम्रो खेलकुद) – नेपालले मुख्य प्रशिक्षक मोन्टी देशाईको प्रशिक्षणमा घरेलु मैदानमा पहिलो अन्तर्राष्ट्रिय खेल हारेको छ । मोन्टी गत माघमा नेपालको मुख्य प्रशिक्षक बनेर आएका थिए ।

उनको प्रशिक्षणमा नेपालले फागुनमा आइसिसी विश्वकप लिग २ त्रिकोणात्मक सिरिजमा नामिबिया र स्कटल्यान्डसँग खेलेको थियो । टियुमा नेपालले उक्त चार खेल नै जितेको थियो ।

त्यसपछि नेपाली टोली युएई र पपुवा न्युगिनीसँग दुबईमा गएर लिग २ को खेल खेलेको थियो । त्यहाँ नेपालले चार मध्य तीन खेल जितेको थियो । लगत्तै नेपालले लिग २ मा टियु मैदानमा युएई र पपुवा न्युगिनीलाई समान चार खेलमा हराएको थियो ।

मोन्टीको प्रशिक्षणमा नेपालले लिग २ मा खेलेका आठ खेल नै जितेको थियो । गत वैशाखमा नेपालले एसिसी प्रिमियर कपमा समूह चरणमा तीन र फाइनलमा गरि कुल चार खेल जितेको थियो । प्रिमियर कपमा समूह चरणको साउदी अरेविया र सेमिफाइनलमा कुवेतसँगको खेल भने वर्षाको कारण रद्ध भएको थियो ।

त्यस्तै नेपालले त्रिकोणात्मक टि२० आई सिरिजमा नेपालले मुलपानी मैदानमा हङकङ र युएई दुबैलाई हराएको थियो । नेपालले मोन्टीको प्रशिक्षणमा घरेलु मैदानमा लगातार १६ खेल जितेको थियो ।

लिग २ मा आठ, प्रिमियर कपमा चार र त्रिकोणात्क टि२० आई सिरिजमा चार गरि कुल १६ खेल मोन्टीको प्रशिक्षणमा घरेलु मैदानमा नेपालले जितेको थियो । त्यो जित यात्रा युएईले टि२० त्रिकोणात्मक सिरिजको फाइनलमा समाप्त गरेको छ । नेपाल १७ औं खेलमा घरेलु मैदानमा मोन्टी आएपछि पराजित भएको हो ।

मोन्टीको मुख्य प्रशिक्षणमा नेपालले सानदार प्रदर्शन गर्दै आएको छ । नेपालको मुख्य प्रशिक्षणमा नेपालले ओडिआई मान्यता जोगाउनुको साथै, विश्वकप छनोट र एसिया कप जस्ता ठूलो उपलब्धी हात पारेको छ । नेपालले पछिल्लो समय ब्याटिङमा लगातार उत्कृष्ट प्रदर्शन गर्दै आएको छ ।