एजेन्सी – नेपाल यू१९ विश्वकप २०२४ मा आफ्नो पहिलो खेल न्युजिल्यान्डसँग खेल्ने भएको छ । अन्तर्राष्ट्रिय क्रिकेट परिषद् ९आइसिसी० ले यू१९ विश्वकपको समूह र खेल तालिका सार्वजनिक गरेको छ ।

यु१९ विश्वकप २०२४ जनवरी १३ देखी ४ फेब्रुअरी सम्म श्रीलंका चल्नेछ । नेपाल, अफगानिस्तान, पाकिस्तान र न्युजिल्यान्ड समूह डी मा छन् ।

नेपालले आफ्नो पहिलो खेल श्रीलंकाको कोलोम्बोमा पुष २८ (जनवरी १३) मा न्युजिल्यान्डसँग खेल्दै सुरुवात गर्नेछ । नेपालले कोलोम्बोमा नै पाकिस्तानसँग माघ ३( जनवरी १७) मा खेल्नेछ ।

समूह चरणको अन्तिम खेल नेपालले माघ ६(जनवरी २०) मा अफगानिस्तानसँग खेल्नेछ । नेपाल शीर्ष तीनमा पुग्न सकेको खण्डमा अर्को चरणमा स्थान बनाउनेछ ।

यसअघिको संस्करणको जस्तो क्वाटरफाइनल हुँदै सेमिफाइनल हुनेछैन । चार समूहबाट शीर्ष तीन टोली अर्को समूहबाट आउने तीन टोलीसँग भिड्नेछन् । समूह ए को समूहले सी को समूहबाट आउनेसँग प्रतिस्पर्धा गर्नेछ ।

समूह बी को शीर्ष तीन टोलीले समूह डीबाट आउनेससँग खेल्नेछ । शीर्ष दुई टोली सेमिफाइनल पुग्नेछन् । समूह चरणमा शीर्ष तीनमा पर्न नसक्ने टोली १२ देखी १६ स्थानको लागि प्रतिस्पर्धा हुनेछ । आइसिसीले यू-१९ विश्वकपमा प्लेट च्याम्पियन हटाएको छ ।

समूह ए मा भारत, बंगलादेश, आयरल्यान्ड र अमेरिका छन् । समूह बी मा इंग्ल्यान्ड, दक्षिण अफ्रिका, वेस्टइन्डिज र स्कटल्यान्ड छन् । समूह सी मा अष्ट्रेलिया, आयोजक श्रीलंका, जिम्बावे र नामिबिया छन् ।

क्षेत्रिय छनोटबाट नेपाल, अमेरिका, स्कटल्यान्ड, न्युजिल्यान्ड र नामिबिया आएका थिए । आयोजक श्रीलंकासँगै अफगानिस्तान, अष्ट्रेलिया, बंगलादेश, इंग्ल्यान्ड, भारत, आयरल्यान्ड, पाकिस्तान, दक्षिण अफ्रिका, वेस्टइन्डिज र जिम्बावेले सोझै विश्वकपमा पुगेका थिए । नेपालले आइसिसी यू१९ विश्वकप एसिया क्षेत्र छनोटमा घरेलु टोली युएईलाई ७ रनले हराउँदै विश्वकपमा स्थान बनाएको थियो ।