काठमाडौं (हाम्रो खेलकुद) – बागमती प्रादेशिक किकेट संघले काठमाडौं महानगरपालिकासँगको सहकार्यमा विद्यालय स्तरका ५० प्रशिक्षकहरुलाई तालिम दिने भएको छ । बागमतीका अध्यक्ष पारस खड्का र काठमाडौं महानगरपालिकाका मेयर बालेन शाहबीच उक्त कार्यक्रम गर्ने सम्झौता भएको छ ।

‘बागमती प्रदेशको आयोजनामा र काठमाडौं महानगरपालिकाको आर्थिक सहयोगमा महानगरपालिका भित्रका ५० विद्यायलको प्रतिनिधित्व रहनेछ । आगमी असोज १६ देखि २० गतेसम्म संचालन हुने कार्यक्रममा विद्यालयबाट प्रतिनिधित्व गरेर आउने प्रशिक्षकहरुलाई अन्तर्राष्ट्रिय क्रिकेट परिषद् (आइसिसी) को ओ लेभल प्रशिक्षक तालिम दिइनेछ’, बागमतीले प्रेस विज्ञप्तिमा भनेको छ ।

दुई साता अघि मात्रै पारस खड्का बागमती प्रादेशिक किकेट संघको अध्यक्षमा निर्वाचित भएका थिए । ग्रासरुट क्रिकेट विकास गर्न यस कार्यक्रम गर्न लागेको पारसले जनाएका छन् ।

‘नेपाली राष्ट्रिय क्रिकेट टोलीले उल्लेखनीय उपलब्धि हासिल गर्दै गर्दा ग्रासरुट क्रिकेट स्तरमा क्रिकेट प्रशिक्षक तथा प्रशिक्षार्थीको अनुपात निकै न्यून रहेको हाम्रो बुझाई छ। यस समस्यालाई सम्बोधन गर्न, बागमती प्रादेशिक क्रिकेट संघ र काठमाडौं महानगरपालिकाको सहकार्यमा काठमाडौं क्रिकेट प्रशिक्षक विकास कार्यक्रमको आयोजना गरेका छौं’ अध्यक्ष पारसले भनेका छन् ।

त्यस्तै उनले महानगरपालिकाले बागमती प्रदेश क्रिकेट सङ्घको प्राविधिक सहयोगमा काठमाडौं महानगरपालिका अन्तर्गतका केही स्कुल तथा वडाहरूमा क्रिकेट नेट राख्ने व्यवस्था समेत गरिरहेको जानकारी दिएका छन् ।