काठमाडौं (हाम्रो खेल्कुद) – रुस्लान कप क्रीकेटको फाइनलमा नेपाल पुलिस क्लब र त्रिभुवन आर्मी क्लब भिड्ने भएका छन । आज भएको पहिलो सेमिफाइनलमा न्यू हाेरार्इजनलाई ६ विकेटले पराजित गर्दै पुलिस फाइनल प्रवेश गरेको थियो भने दोस्रो सेमिफाइनलमा एसपिएलाई ७० रनले पाखा लगाउदै आर्मी ले फाइनलमा स्थान पक्का गरेको हो ।

म्यान अफ द म्याच दिपेन्द्र ऐरिको ३ विकेटमा पुलिसले न्यू हाेरार्इजनलाई २० ओभरको अन्त्यमा सबै विकेट समेट्दै ८२ रनमा रोक्न सफल भयो ।  न्यू हाेरार्इजनलाई सेमिफाइनलमा स्थान दिलाउन राम्रो योगदान दिलाएका कृष्ण कार्की सेमिफाइनलमा पनि २७ बलको सामना गर्दै २५ रनमा अविजित रहे । ८३ रनको सानो लक्ष्य पछ्याएको पुलिसले १८औं ओभरमा ३ विकेट गुमाउदै चुनौती पार गर्‍यो । पुलिसकोलागी सुनिल धमलाले ३६ रन जोडे ।

आजै भएको दोस्रो सेमिफाइनलमा आर्मी को विशाल योगफल एसपिएलाई भारी पर्‍यो । सागर पुनको बिष्फोटक ब्याटिङले आर्मी ले निर्धारित २० ओभरमा ६ विकेट गुमाउदै १८६ रन जोड्यो । सागर पुनले ५६ बलको सामना गर्दै ८ चौका र १ छक्काको मद्धतले ७५ रनको योगदान दिए । त्यस्तै राजेश पुलामिले ५५ र अनिल मण्डलले ३० रन जोडे ।

जवाफमा एसपिएले २० ओभरमा ७ विकेट गुमाउदै ११७ रन मात्र जोड्यो । एसपिएकालागी ओपनर बिजय राणा र रोमन बामले क्रमश: ३८ र २५ रनको योगदान दिए । आर्मीका अविनाश कर्णले ३ विकेट लिए ।