काठमाडौं (हाम्रो खेलकुद) – नेपालकी अलराउन्डर सीता रानामगरले चार देश सम्मिलित महिला टि२० आई खेलमा हङकङविरुद्ध महत्वपूर्ण तेस्रो सफलता दिलाएकी छिन् । मलेसियाको बायोमास ओभलमा टस हारेको हङकङले १४ ओभरमा ४ विकेट गुमाउँदै ६६ रन बनाएको छ ।

सीताले १३ औं ओभरको चौथो बलमा सिंह यान डोरोथेआ चानलाई १३ रनमा कविता कुँवरबाट क्याच गराइन् । उनले ३३ बल खेलेकी थिन् । एक समय ३.३ ओभरमा १३-२ को अवस्थामा पुगेको हङकङलाई सिंह यान र का यिंग चानले तेस्रो विकेटका लागि ४२ रनको साझेदारी गरेका थिए ।

का यिंग चान २९ बलमा २ चौका र १ छक्कासहित ३४ रनमा आउट भइन् । १४ औं ओभरको दोस्रो बलमा का यिंगलाई बोल्ड आउट गरेकी हुन् । दुबै सेटर ब्याटर पेभेलिएन फर्केपछि नेपाल पुन हाबी हुन थालेको छ ।

नेपाललाई तेस्रो ओभरको पहिलो बलमै तीव्र गतिकी बलर कविता कुँवरले ओपनर तथा प्रमुख ब्याटर मारिको हिललाई ६ रनमा सीता रानामगरबाट क्याच गराउँदै महत्वपूर्ण सफता दिलाएकी थिइन् ।

डेब्यू खेल खेलेकी तीव्र गतिकी बलर पुजा महतोले चौथो ओभरको तेस्रो बलमा अर्की ओपनर यासमिन दासवानीलाई ६ रनमा बोल्ड आउट गरेकी थिइन् ।