सेमिफाइनलसम्म चितवनमा, फाइनल काठमाडौंमा
राकेश तिमल्सिना
चितवन– चितवनमा हरेक वर्ष पुस २ गतेदेखि शिव पौडेल स्मृति कप अन्तर कलेज क्रिकेटको आयोजना हुँदै आएको थियो । तर यस वर्षको माहोल अलि फरक देखियो । सधै जसो यो प्रतियोगिता नेवि संघ वीरेन्द्र बहुमुखी क्याम्पस इकाइ कमिटीको आयोजनामा हुने गर्दथ्यो ।

यसवर्ष क्याम्पसका नेवि संघ अध्यक्ष बचन कार्कीलाई हटाएर जिल्ला कमिटीले अनिल अधिकारीलाई कार्यक्रम संयोजकको जिम्मा दियो । अन्यौलता र आयोजकको आन्तरिक समस्याले प्रतियोगिता पुस १५ गतेबाट सुरु भयो ।
अघिल्लो संस्करणमा १८ वटा टोलीले सहभागिता जनाएको कारण यस वर्षपनि आयोजकको अपेक्षा सोही थियो । तर अपेक्षा विपरीत १२ वटा टोलीकोे मात्र नाम दर्ता भयो । विगतका ३ संस्करणमा निरन्तर उपस्थिती जनाएको चितवनको बालकुमारी र सप्तगण्डकी कलेजले यसवर्ष प्रतियोगितामा नाम समेत दर्ता गराएनन् । गत संस्करणमा अम्पाएरको गलत निर्णयको कारण देखाउँदै प्रतियोगिता वहिष्कार गरेर गएको पोखरापनि यसवर्ष फर्केन ।

सहभागी १२ टोलीले लिगमा २ खेलेपछि समूह विजेताले सिधै सेमिफाइनल खेले । लिगका खेल त जसोतसो सौहार्दपूर्ण वातावरणमा सम्पन्न भयो । तर रमिता त सेमिफाइनलको खेल भन्दा अगाडि देखियो । प्रतियोगिताको लागि क्रिजमा राखिएको म्याट रातारात हरायो । त्यतिमात्रै होइन कमेन्ट्री बक्स, ब्यानर र मैदानको बाउन्ड्रीसमेत तोडफोड गरिएको थियो ।

म्याट खोज्दै जाने क्रममा आयोजकले तालिम केन्द्र नजिकैको खाडलमा फेला पा¥र्यो । अन्तत : सेमिफाइनल खेल निर्धारित समयमा नै सुरु भयो । सेमिफाइनल बिथोल्ने नियोजित षडयन्त्र बुनेर रातारात यस्ता गतिविधि भएको कार्यक्रम संयोजक अनिल अधिकारीको दाबी छ । राष्ट्रिय तथा अन्तर्राष्ट्रिय खेलाडीले खेलेको मैदानमा त्यस किसिमको तलले स्तरको कार्य हुनु लज्जास्पद भएको स्वर्गिय शिव पौडेलकी श्रीमती एवं प्रतियोगिताकी संरक्षक बिनु रायमाझी पौडेलले बताउँछिन् ।

पछिल्लो समय क्रिकेटको छोटो र्फम्याट टि–ट्वान्टी ज्यादै लोकप्रिय खेल बनेको छ । यो खेल जति लोकप्रिय छ त्यति महङगो पनि छ । तर प्रतियोगितालाई नियाल्दा आयोजक पूर्ण रुपमा क्याची इजुकेशन कन्सल्टेन्सीमै निर्भर रह्यो । जो यस प्रतियोगिताको मुख्य प्रयोजक हो । मैदानमा क्याची इजुकेशन कन्सल्टेन्सीको एउटा मात्र ब्यानर थियो ।

सायद त्यही कारणले होला प्रतियोगिता खेल्न आएका खेलाडीहरु पनि आयोजकका व्यवस्थापनप्रति खासै सन्तुष्ट थिएनन् । प्रतियोगिताको निरन्तरताले आयोजकमा निखारता नथपिएको आभाष हुने खेलाडीहरुको प्रतिक्रिया थियो । तर केहीले भने प्रतियोगिता नै नभइरहेको बेला आफुहरुले खेल्न पाउनु नै राम्रो मौका रुपमा हेरेका छन् ।

देशकै ठूलो पार्टी नेपाली काङग्रेसको भातृ संगठन तरुण दल र नेवि संघ गुट–उपगुटमा विभाजित हुदाँ त्यसको प्रत्यक्ष असर यस प्रतियोगितामा पर्यो । प्रतियोगिताको दौरान तरुण दल चितवन र नेवि संघ चितवनबिच समन्वय र तालमेलको निकै कमी देखियो । तमाम अप्ठ्याराका वावजुत प्रतियोगिताको सेमिफाइनल सम्पन्न भइसकेको छ । चौथो संस्करणको रुपमा आयोजित शिव पौडेल स्मृति कप अन्तर कलेज क्रिकेटको फाइनल खेल माघ ६ गतेका लागि सारिएको छ । पूर्व निर्धारित तालिका अनुसार फाइनल पुस २८ गते तोकिएको थियो । मैदान व्यवस्थापन र आन्तरिक तयारीका लागि फाइनल खेल माघ ६ गते सारिएको आयोजकले जनाएको छ । फाइनलमा काठमाडौँका दुई कलेज सीसीआरसी र हर्टल्याण्डबीचको प्रतिस्पर्धा हुनेछ ।