काठमाडौँ (हाम्रो खेलकुद) – ओपनर शंकर राणाले अविजित शतक बनाएपछि राजधानीमा जारि रुस्लान टि-२० क्रिकेट प्रतियोगितामा न्यु होराइजन क्रिकेट क्लबले कुलेश्वरक्रिकेट क्लबलाई ११३ रनको विशाल अन्तरले पराजित गरेको छ।

टस जितेर ब्याटिङ रोजेको न्यु होराइजनका लागि पनर शंकर राणाले ७१ बलमा १४ चौका र ४ छक्काको मद्दतले अविजित ११५ रनको आकर्षक पारी खेले। ३६ बलमा अर्धशतक पुरा गरेका राणाले ६५ बलमा आफ्नो शतक पुरा गरेका थिए। उनकै शतकीय पारीको मद्दतले न्यु होराइजनले १९९/२को विशाल स्कोर खडा गरेको थियो। राणाले दोश्रो विकेटका लागि ३९(३३) रन बनाएका निर्मल थापासंग १३४ रनको साझेदारी पनि गरेका थिए। होराइजनका दुवै विकेट रमेश क्षेत्रीले लिएका थिए।

२सय रनको विशाल लक्ष्य पछ्याएको कुलेश्वर क्रिकेट क्लब कुनै समयपनि आफ्नो लक्ष्यतिर अग्रसर देखिएन र निर्धारित २० ओभरमा ९ विकेटको क्षतिमा ८६ रन मात्र बनाउन सक्यो । उसका लागि ओपनर रमेश क्षेत्रीले २४(३०) बनाउनु बाहेक कसैले पनि दोहोरो अंक छुन सकेनन। होराइजनका बिशाल सुनारले एक ओभरमा २ रन दिदै तिन विकेट लिएका थिए भने साहब आलमले कसिलो बलिङ गर्दै ४-१-७-१को प्रदर्शन गरे।

शतकीय पारी खेलेका ओपनर शंकर राणा खेलको म्यान अफ द म्याच घोषित भए। क्वार्टरफाइनलमा न्यु होराइजनले नेपाली राइनोजको सामना गर्नेछ। नेपाली राइनोजले यसअघी आफ्नो पहिलो खेलमा एपीएफलाइ हराएको थियो।