एजेन्सी – कप्तान रोभम्यान पावेलको आक्रामक ब्याटिङमा घरेलु टोली वेस्टइन्डिजले तेस्रो टि२० आई खेलमा भारतलाई १ सय ६० रनको प्रतिस्पर्धात्मक लक्ष्य दिएको छ । गयानामा टस जितेर पहिला ब्याटिङ रोजेको वेस्टइन्डिजले निर्धारित २० ओभरमा ५ विकेट गुमाउँदै १ सय ५९ रन बनायो ।

वेस्टइन्डिजका कप्तान रोभम्यान पावेल १९ बलमा १ चौका र ३ छक्कासहित सर्वाधिक ४० रनमा नटआउट रहे । ओपनर ब्रेन्डन किंग ४२ बलमा ५ चौका र १ छक्कासहित ४२ रन बनाए ।

वेस्टइन्डिजलाई ओपनर कायल मेयर्स र ब्रेन्डन किंगले पहिलो विकेटका लागि ७.४ ओभरमा ५५ रनको साझेदारी गर्दै राम्रो सुरुवात दिलाएका थिए । स्पिनर अक्षर पटेलको बलमा मेयर्स ठूलो सटको धुनमा अर्शदीप सिंहबाट २५ रनमा क्याच आउट भए । मेयर्सले २० बलमा ३ चौका र १ छक्का प्रहार गरे ।

जोनसन चाल्र्सलाई कुलदीप यादवले १२ रनमा एलबीडब्लू आउट गरे । उच्च लयमा रहेका निकोलस पुरन स्पिनर कुलदीप यादवको १५ औं ओभरको पहिलो बलमा २० रनमा स्टम्पिङ आउट भए ।

पुरन १२ बलमा २ चौका र १ छक्का प्रहार गर्दै सन्जु स्यामसनबाट स्टम्पिङ आउट भएका थिए । त्यसै ओभरको पाँचौं बलमा ब्रेन्डन किंग ४२ रनमा कट एण्ड बोल्ड आउट भएका थिए । शिम्रन हेटमायर ८ बलमा १ चौकासहित ९ रनमा आउट भए ।

भारतका स्पिनर कुलदीप यादवले ४ ओभरमा २८ रन खर्चेर ३ विकेट लिए । अक्षर पटेलले ४ ओभरमा २४ रन खर्चेर १ विकेट लिए । मुकेश कुमारले २ ओभरमा १९ रन खर्चेर १ विकेट लिए । पाँच टि२० आई खेलको सिरिजमा वेस्टइन्डिज २–० ले अघि छ ।