एजेन्सी – नेपाली क्रिकेट टोलीका अलराउन्डर दीपेन्द्रसिंह ऐरी सम्मिलित मोन्टरिएल टाइगर्सले ग्लोबल टि२० क्यानडामा टोरोन्टो नेशनललाई डकवर्थ लेविस पद्धतिको आधारमा २३ रनले हराएको छ । दीपेन्द्रको टोली शीर्ष चारमा रहँदै प्लेअफ खेल्ने पनि पक्का भएको छ ।

वर्षाको कारण खेल प्रभावित हुँदै ६–६ ओभरको मात्रै भएको थियो । त्यसैको कारण दीपेन्द्रले प्लेइङ ११ मा भएपनि बलिङ र ब्याटिङ दुबै गर्ने अवसर पाएनन् । ओन्टारियोमा टस हारेर पहिला ब्याटिङको निम्तो पाएको मोन्टरियलले निर्धारित ६ ओभरमा २ विकेट गुमाउँदै ७७ रन बनायो ।

युएईका कप्तान समेत रहेका ओपनर मोहम्मद वासिमले १३ बलमा १ चौका र २ छक्कासहित २४ रन बनाएका थिए । कप्तान क्रिस लिनले १८ बलमा २ चौका र ३ छक्कासहित ३८ रनमा अविजित रहे । शेर्फान रदरफोर्ड ७ रनमा आउट भए ।

जितको लागि ७८ रनको विजयी लक्ष्य पछ्याएको टोरोन्टोले ६ ओभरमा २ विकेट गुमाउँदै ५४ रन बनायो । जेजे स्मित १६, ड्यारेन ब्राभो १५, सिकन्दर राजा ७ र हम्जा ताहिरले १० रन जोडे ।

मोन्टरिएल ६ खेलमा ४ मा जित र १ मा हारसहित ९ अंकका साथ शीर्ष स्थानमा छ । प्लेअफमा पनि स्थान बनाएको छ । अन्तिम खेल भोली राती भ्यानकुभेर नाइट्ससँग खेल्नेछ । उता सन्दीप सम्मिलित सर्रे जागुअर्स ५ खेलमा २ मा जित र १ मा हारसहित ६ अंकका साथ तेस्रो स्थानमा छ ।

सर्रेले भने दुई खेल खेल्न बाँकी छ । सर्रेले आज साँझ ब्रेम्पटन वल्भससँग खेल्नेछ । सर्रेले भोली साँझ अन्तिम खेल मिसियौगा प्यान्थर्सससँग खेल्नेछ ।