काठमाडौं (हाम्रो खेलकुद) – नेपाली क्रिकेट टोलीमा सात महिनापछि खेल्ने मौका पाएका अर्जुन साउद एक रनमै आउट भएका छन् । आइसिसी विश्वकप छनोट अन्तर्गत प्लेअफ खेलमा नेपालले अर्जुन साउदलाई युएईविरुद्ध मौका दिएको थियो ।

नियमित ओपनर तथा विकेटकिपर आसिफ शेखलाई विश्राम दिँदै नेपालले अर्जुनलाई आजको खेलमा खेल्ने मौका दिएको थियो । तर अर्जुन एक रनमै आउट हुन पुगेका छन् । जितको लागि १ सय ८२ रनको मध्यम विजयी लक्ष्य पछ्याएको नेपालले कुशल भुर्तेल र अर्जुन साउदलाई ओपनिङ पठाएको थियो ।

युवा तीव्र गतिका बलर मोहम्मद जवादुल्लाहको बलमा अर्जुन ओभरको ओभरको पहिलो बलमै एलबीडब्लू आउट भएका थिए । पाँच बल खेलेका उनले एक रन मात्रै बनाउन सके । अर्जुनले नेपालको प्लेइङ ११ मा सात महिनापछि मौका पाएका थिए । उनले अन्तिम पटक स्कटल्यान्डविरुद्ध विन्डहोकमा डिसेम्बर ८ मा खेल्ने मौका पाएका थिए ।

नामिबिया भ्रमणमा अर्जुनको प्रदर्शन राम्रो हुन नसकेपछि र केहि सुस्त शैलीमा खेलेपछि पुन खेल्ने मौका पाएका थिएनन् । ओपनर आसिफ शेख र कुशल भुर्तेलको जोडीले लगातार राम्रो प्रदर्शन गरेपछि अर्जुन वैकल्पिक विकेटकिपरको रुपमा खेलेका थिए ।

नेपाल विश्वकप छनोट दौडबाट बाहिरी सकेको छ । यो प्रतिष्ठाको लडाई हुँदा नेपालले आसिफलाई विश्राम दिने निर्णय लिएको थियो । नेपाल यस खेलमा विजयी भएमा सातौं स्थानको लागि आयरल्यान्डसँग खेल्न पाउनेछ । पराजित भएमा नेपालले नवौं स्थानको लागि अमेरिकासँग खेल्नुपर्ने हुन्छ ।

१ सय ८२ रनको विजयी लक्ष्य पछ्याएको नेपालले ७ ओभरमा १ विकेट गुमाउँदै २६ रन बनाएको थियो । ज्ञानेन्द्र मल्ल १० र कुशल भुर्तेल १५ रनमा क्रिजमा छन् ।