एजेन्सी – उपाधिको प्रमुख दाबेदार श्रीलंकाले जिम्बावेमा जारी आइसिसी विश्वकप छनोटमा युवा तीव्र गतिका बलर दिलशान मदुशानकालाई टोलीमा समेटेकोछ । प्रमुख तीव्र गतिका बलर दुश्मन्था चामिरा चोटका कारण घर फर्किनु परेपछि उनलाई टोलीमा समेटेको जनाएकोछ । दिलशान श्रीलंकाको वैकल्पिक खेलाडीको सूचिमा थिए ।

२२ वर्षीय बायाँ हाते बलर दिलशानले श्रीलंकाबाट २ ओडिआई र ११ टि२० आई खेल खेलेका छन् । गतवर्ष श्रीलंकालाई अप्रत्याशित रुपमा एसिया कपको उपाधि जिताउन उनले उत्कृष्ट प्रदर्शन गरेका थिए ।

भारतलाई ६ विकेटले हराउनेक्रममा उच्च प्रदर्शन गरेका थिए । दिलशानले ४ ओभरमा २४ रन खर्चेर ३ महत्वपूर्ण विकेट लिएका थिए । विराट कोहलीलाई शून्यमा बोल्ड, ऋषभ पन्तलाई १७ रनमा क्याच र दिपक हुुडालाई ३ रनमा बोल्ड गरेका थिए ।

उनले श्रीलंका ए टोलीबाट घरेलु मैदानमा यसै महिना दक्षिण अफ्रिका ए विरुद्ध उच्च प्रदर्शन गर्दै तीन खेलमा ९ विकेट लिएका थिए । श्रीलंका विश्वकप छनोटमा सुपर सिक्समा २ खेलमा ४ अंकका साथ दोस्रो स्थानमा छ । श्रीलंका समूह बी बाट अपराजित रहँदै आएको थियो ।

श्रीलंकाले आज नेदरल्यान्ड्ससँग खेल्दैछ । श्रीलंकाले त्यसपछि आइतबार जिम्बावे र शुक्रबार वेस्टइन्डिजसँग खेल्नेछ । श्रीलंकालाई विश्वकपमा पुग्न तीन मध्य दुई जित पर्याप्त हुनेछ ।

श्रीलंकाले तीव्र गतिका बलरमा लाहिरु कुमारा र कसुन रजिथालाई मैदान उतार्दै आएको छ । मथिसा पाथिरानालाई बेन्चमा राख्दै आएको छ ।